富豪飯堂 愈開愈多

【明報專訊】話說近日有很多報道，說華人置業（0127）大股東劉鑾雄常常幫襯尖沙嘴半島酒店的嘉麟樓，但八卦雜誌當然沒講原因。其中一個原因，是福臨門的幾個大廚都跳槽到了嘉麟樓，大劉咁識食，咪轉過去幫襯囉！不過劉生近日小病在身，很多時在家裏吃飯，所以也撬了幾個福記的廚師去做他的家廚，不但保證有水準，而且還可以吃得好健康𠻹！

富豪大廚多出身福臨門

如果你問，福臨門走咁多廚師，水準保唔保持到㗎？我會答，唓！香港幾乎全部富豪飯堂的大廚，都是福臨門教出來㗎啦，知識呢家嘢，一個人教，幾個人學，幾個人再教，幾十個人便學會了，幾十年間，可以傳得好快，唔係今日香港又點會有咁多間富豪飯堂呢？（按﹕學煮高級菜式不難，十零年就可滿師，一定可以整到一桌一流的菜色，要幾好食有幾好食。但要經營一間大型的富豪飯堂，又要顧成本，又要入靚貨，那就並非人人可以做到。)

再說一單軼事，話說當年楊貫一在富臨做經理，沒錯，他是樓面出身，下班宵夜時，便約埋福臨門的大廚，幾杯威士忌下肚，聽埋聽埋，便學識了整鮑參翅肚的秘藝。然後自己研究，終於創出了阿一鮑魚，成為了富臨的招牌菜𠻹！

富豪酒家源自富臨，海都從新鴻基中心變成了現在的三間，富聲又是出自海都班底，現在也是開了三間。家陣香港經濟不景，不過富豪飯堂就愈開愈多，人手猛搶，去年，福臨門有部分班底去了新開張的澳門銀河，從福臨門拆出來的國福樓，遲些會搬去中環，原址則由皇悅酒店再開一間，富臨又在銅鑼灣的Tower 535開多一間……乜香港真係有咁多有錢人咩？

[周顯 投資二三事]

http://www.mpfinance.com/fin/columnist2.php?col=1463481127012&node=1472497276082&issue=20160830