內地人港「做嘢」有優勢

【明報專訊】有一宗軼事，就是有一次，監管機構調查某君，這名仁兄不是香港人，而是福建人，長期居住在福建。他把一切文件和口供準備妥當之後，決定不去躲避，而是主動叫對方去福建，同他錄口供。主動投案，有無咁易話為呀？

但對方想一想，吓，福建？容乜易被人溶咗都未天光！手下嗰班，打工仔啫，當然無咁勇猛，個個耍手擰頭，無人肯去，結果單畸士唯有不了了之。查實對方都是「善意」，打算錄完口供之後，了結單案，但對方又點知呢？

我聽了這個故事笑說﹕「當年黃仕靈單東寧案，都是叫人入江門，都是無人肯制。有莊家同他拗數，一個要入江門講，另一個則要在尖沙嘴講，結果爭持之下，大家約了在中環講……其實中環都唔係絕對安全，雪茄林就是在陸羽被人做低的。」

中證監也不敢入軍區抓人

所以，內地人在香港做案炒股票，有着絕對的優勢，因為監管當局根本沒有膽子去內地執法。然後，有人同我說﹕「內地三山五嶽，連中證監的人都唔敢去軍區找人，都驚有去無回！」

老實講，莫講是中證監，如果我是美國證監，要去到德州牛仔的荒山野嶺，去找一班鄉下佬去問話，我都肯定淆底唔敢去。

那天有人講起，某富豪飯堂居然有蒼蠅，我說﹕「你咁講，證明你好少去，那裏向來有兩隻蒼蠅，據說是養的風水蒼蠅，已經養了好多年，一直在飛來飛去，個個熟客都知。」

不過朋友問了一句﹕「吓！乜蒼蠅有咁長命嘅咩，我記得好像只有兩個月命咋噃！」

我無言，已被K.O.。

[周顯 投資二三事]

http://www.mpfinance.com/fin/columnist2.php?col=1463481127012&node=1472064208688&issue=20160825