低調富豪上八卦封面 因禍得福

【明報專訊】朋友無端端成為了雜誌封面人物，這種藝人偽造新聞博宣傳的伎倆，我們明眼人一看便看穿，這非但絕不可能，那名涉事女星也「唔啱價」：邊個送兩間屋畀佢，肯定是「出錯價」了。

其實，嗰單報道都錯得好緊要，呢位隱形富豪，點止得幾億銀物業咁少呀？再講，他炒股票又點止是在九十年代呀，一直都係中堅分子啦，我哋成日見面，交流股票心得，佢畀咗唔少股票貼士我，幫我贏咗唔少錢。

娛圈中人爭住嚟傾生意

至於佢本人，佢十幾年前炒某一隻股票，都贏咗幾億銀，呢幾年有幾隻pre-IPO，好似冷氣機呀，藥品公司呀，上市後股價都爆升幾倍，又係億億聲咁贏，你哋話佢有幾多錢身家嘞。

不過這個人好低調，著平衫、搭巴士，司機給家人用，請客就成日請，自己就食得簡單，最大的支出，就是搞搞娛樂事業，以及借錢給朋友，但不會追還錢的那一種。

不過，發生咗這些八卦事件，大家都有點擔心他，會不會被無故牽連了，於是由我出馬，親自同佢探口風、落口供，誰知見到他春風滿面，同我吃了幾十元一個海南雞飯餐。他說：「我哋呢啲玩票的小型娛樂公司，好難同圈中人傾生意，你知啦，娛樂圈中人都跟紅頂白，見到我的賣相平實，仲以為我好無料添。」

我說：「係呀，別人是無料扮四條，你是四條扮無料，啲二打六無見過有錢人，剩係識睇門面牌頭，點知真正有錢人係點樣。」 他說：「但經過這單嘢之後，個個都以為我出手豪爽，爭住來同我傾生意，哈哈，這叫做因禍得福！」

[周顯 投資二三事]

http://www.mpfinance.com/htm/finance/20151019/columnist/en30_en30.htm