愛扮正義粉飾形象

我寫評論文章，向來有一個原則，就是從來不為自己的立場說話，而只為了公眾利益，公正地作出評論。我當然並不是這麼大公無私，只是我想﹕唔通我寫一篇文章，就會影響到全世界，他們會聽我的話咩！反正說了都無用，不如扮正義扮高調，講一下公正話，攞下分都好吖！

記得在幾年前，社會講起立法會議員減薪，黃毓民馬上表示贊成，但劉慧卿和多位議員就表示反對，認為立法會議員的收入都不算高。從這一件小事，就可知黃毓民的段數實在高出幾班﹕唔通自己贊成減薪，就真係會減到自己的身上咩！而家大家人工照出，不過自己就做咗正義人士，人哋就做咗醜人，誰高誰低，一看便知。

所以，我在文章中，也常常去責罵細價股的某些炒法，認為當局應該馬上去作出管制，這也句句是肺腑之言﹕反正我講了，唔通證監又會聽我話照做咩！我講下，扮正義人士，粉飾一下(本來已經很壞的)形象，都唔知幾好！

https://hexapost.wordpress.com/2015/10/29/%E3%80%90%E5%91%A8%E9%A1%AF%E9%9B%9C%E8%A8%98%E3%80%91%E6%84%9B%E6%89%AE%E6%AD%A3%E7%BE%A9%E7%B2%89%E9%A3%BE%E5%BD%A2%E8%B1%A1/