學友的歌和妓女的技巧

那天，一位又聰明又靚仔的朋友，去聽瑞銀搞張學友演唱會。這些小戶，開幾百萬美金戶口，坐的當然是偏遠的位置，至於那些大戶，幾千萬美金存款，先至有資格坐中間也。

當晚張學友唱甩了幾個音，但這位又聰明又靚仔的朋友說﹕「無所謂啦，我橫掂唔中意聽張學友，不過見唔使錢，先至來聽咋。」

其實張學友，我都麻麻地，不過姑且同他說﹕「喂，阿學友，歌神來架噃，你因乜咁都唔啱聽？」

他說﹕「我就是唔中意聽他的歌唱得太好，使唔使成日唱到咁好呀？可唔可以唱得hea D，輕鬆D，好似許冠傑咁，咪幾好聽。」

我說﹕「其實我都係中意張學友初出道時，唱情已逝，新手但個feel好好，當他唱到變成了老餅，技術高了，技巧玩多了，但個feel就沒有了。」

他說﹕「所以呢，一個人初聽歌，聽的是個feel，聽得久了，便要聽技巧，但真正的專家，又會聽返個feel。」

我同意說﹕「這好比去嫖妓，條女十八般武藝做足全套，你反而不喜歡，但一條新女，乜嘢都唔識，好生疏，但反而有新鮮感。

他好奇地問﹕「點解你講乜嘢都會講到女人既？」

我笑說﹕「為咗啱你胃口，等你聽得明啫。唔通我同你講寫作，話寫作初期，有feel但文字差，後來變成了職業作家，文字進步了，但外行人看作品，以為文字美，寫得有內涵，就係好，但其實真正的行家，看的是feel。」

他果然聽不明白我講乜。

股市繼續下跌尋底，無嘢炒。

本文章由作者為橙新聞獨家供稿

作者簡介：

周顯，著名的炒股理論家，吃喝玩樂家，不著名的歴史學家、政治學家，過去還曾經當過社論主筆和武俠小說作者。

http://www.orangenews.hk/finance/system/2015/09/30/010021734.shtml