十億身家也只租樓住

【明報專訊】前幾天，碰到某名老友，十幾年前，我同他一個星期見一次，猶如黃紙兄弟，後來他連續搞了幾隻股票，彈起了，成為了散戶咬牙切齒的仇人，也是證監努力尋找的對象，更加有不少大戶輸了很多錢，要喊打喊殺，所以，我近來都很少見到他了。

那天碰到他，講起花錢，我說﹕「我吃最好的，穿最好的，連超級富豪也比不上我在這兩方面的生活享受，因為這兩瓣花不了什麼錢，但是，講到樓，一億都不算豪宅，船我又買不起，更加養不起。」

他說﹕「但車你買得起呀！」

我說﹕「法拉利我買得起，但整不起，我手車咁渣，個個月都撞車，小整都二三十萬，邊有錢畀呀？勞斯萊斯我都買得起，不過司機住間公屋，個停車場泊不了咁大㗎車，我間屋個停車場都好細，也泊不了，勞斯萊斯要泊大車位，司機無得泊車回家，要朝朝去攞車，最少要加5000蚊人工，又點畀得起呀？」

愈是豪宅 回報愈低

然後我們講起樓價，我說﹕「香港的樓咁貴，連四大家族都無得住美國富豪式的大花園洋房，幾億銀一間house都間間千篇一律、bad taste到不堪，我看Discovery Channel，歐洲的大屋幾咁有品味，都係幾千萬一間。我就唔捨得買嘞……就算捨得，都無錢。係呢？你住喺邊？」

他說﹕「我住御峰，兩千幾呎，租十五萬，抵唔抵呀？」

我說﹕「咁抵？果然愈是豪宅，回報愈低。」

有十億八億身家的人，都是租樓，由此可以見得，香港的地產霸權是多麼的橫行霸道。

[周顯 投資二三事]

https://www.mpfinance.com/fin/columnist2.php?col=1463481127012&node=1510687768306&issue=20171115