新福港潛水三大「死因」

【明報專訊】過去幾日的股市簡直是衰到無倫，淡靜到不能忍受，幾乎每個行家都叫苦連天，在上星期四，連大家以為贏梗的新福港(1447)，都要跌穿招股價，簡直令人痛不欲生。

說到新福港這隻股票，有着所有贏錢的因素，由老牌家族，政商權貴羅鷹石家族所擁有，歷史悠久，曾經是上市公司，資深股民無不聽過這名字，在2008年曾經企圖上市，當時預算集資12億元，現在則只是集資1.35億元，大減價九成，仲唔係抵到爛的股票？

然而，這隻抵到爛的股票，最終還是跌穿招股價，這固然是因為市况太壞，但也不無內在的原因。

無萬惡莊家維持秩序

第一，前文說過，羅家是政商權貴，當然不會做莊炒股票這樣低莊的行為，他們搞上市，當然是高貴地、依正手續地，把股票配售沽掉，便拍手走人，關人鬼事，完全合法……但當股價沒有萬惡的莊家去維持秩序時，結果係點，大家咪見到囉！

第二，據線人說，當日傾上市時，有市場中人提出意見，喂，呢隻股票咁細隻，得幾億市值咁大把，不如折細D，幾毫子上市，好炒D噃！但當然，以羅家的地位，自然不能上一隻毫子股，皆因當局都不鼓勵毫子股，成日要打壓住呢D細價股啦。堂堂權貴，又點可以上隻細價股呢？但集億幾的股票，散戶一睇，股價個幾，咁貴，搵鬼買咩！

第三，老細上市，做細嘅梗係捧場，老細也利益均沾，配售人人有份，其中有6000萬元，分給了40個判頭……手花散晒，唔通我去炒，畀你沽來賺錢咩，一上市，大家咪齊齊逃生，人踩人，踩死人囉！

[周顯 投資二三事]

http://www.mpfinance.com/htm/finance/20151214/columnist/en30_en30.htm