江湖大佬 就是兜生意的人

【明報專訊】近日某名江湖人物成為了新聞人物，其實，江湖大佬是如何搵食的呢？

首先，必須要有很多細佬，才能夠做江湖大佬，換言之，有很多細佬跟他搵食，所以，身為江湖大佬，必須要找很多job回來，才能夠養活大批的手下。問題在於，誰人有這麼多的job做呢？

大家以為，做江湖大佬，開黃賭毒生意咪得囉！不過話時話，做生意賺梗㗎咩？如果做生意咁叻，都唔使做黑社會啦！所以，簡單點說，做江湖大佬就是「solicitor」(字面解釋是﹕兜生意的人)，專門找生意，他們的client，就是富豪。這也即是說，江湖大佬，不過是富豪的手下，認識愈多富豪的江湖人，就是愈成功的大佬，這也是一個定律。

主要客戶是富豪

所以我常常說，要年輕人捨棄黑社會的最佳方法，就是使他們知道，黑社會不過是富豪們的擦鞋仔，如果要做黑社會，不如直接努力賺錢，做富豪。我少年時就是因為嫌棄黑社會太窮，成日去茶餐廳，所以死都唔肯加入。

話說好多年前，有一名江湖人想搞公司上市，但交易所質疑他的江湖人身分，不肯讓這家公司上，直至他找了一名高人做保薦人。這名高人同交易所講﹕「他有無案底，你哋仲發咗個經紀牌畀佢添，唔通江湖人唔做得上市公司老闆，但卻可以做經紀？」

結果這家公司成功上了市，而且愈做愈大添，又無玩那些供供合合的花臣嘢，算是頗為正派。高人事後對此事的評語是﹕「江湖人物講口齒，做上市公司，可能仲好過飽讀詩書的大賊！」

[周顯 投資二三事]

http://www.mpfinance.com/htm/finance/20151231/columnist/en30_en30.htm