地產霸權 有人暗幫

【明報專訊】同幾個有名的樓市炒家吃飯，他們說，現在的樓市好假，好多創新高的買賣都是虛假交易，偽造出來的。

我不明白地問：「但是要畀印花稅㗎噃，尤其是幾千萬的樓，畀幾百萬印花稅，咪白蝕？」

有個專門炒細價樓的炒家回答：「用公司名買，公司破產咪得囉。」

我說：「仲衰，公司名要畀多幾倍印花稅，如果唔畀，董事要負責，可以判坐監㗎。」

另一位以摩貨著名的炒家答：「如果公司破產，政府通常唔會做到太過分，唔會告到坐監。」

所以話呢，都係地產霸權有料兼有橋，全香港的市民都為他們打工，都係抵嘅，因為他們非但真係叻過人，而且仲有好多環保分子，去暗中幫助他們𠻹。

樓價升對窮人沒影響

其實，樓價上升，對很多窮人是沒有影響，而且有看不到的好處。試想想，如果住在公屋，永遠沒錢買私樓，如果樓價平，可以用好低價錢去買到大屋，心裏都不平衡啦。如果樓價飛升，咁又唔同講法，一間公屋在手，隨時大把女飛撲過來，結婚都容易啲啦。

又好似林超英這種退休人士，揸樓過世，已經再沒有新購買力了，當然是希望地產霸權延續，樓價愈高愈好，如果我係佢，也會死都唔畀人開發郊野公園，因為費事整冧樓市，累死自己吖嘛。

至於我本人，賺錢能力高，但見到大業主大地主不用工作，資產日日升值，賺錢多我十倍，我都會眼紅，咪日日寫文，砌地產霸權囉。這叫做「屁股決定腦袋」，也可以形容為馬克思主義筆下的階級鬥爭。

[周顯 投資二三事]

https://www.mpfinance.com/fin/columnist2.php?col=1463481127012&node=1508439580361&issue=20171020