股市沒莊家 散戶輸更甘

【明報專訊】股市的熾熱氣氛開始從藍籌股、中價股，炒到了創業板新股，據市場消息人士說，近日上市的殼股都有幾千人入飛，可知散戶如癡如醉的程度。

我說﹕「其實，好多倍的超額認購，根本就完全足夠放棄配售，100%公開發售，仲可以綠鞋，額外發售𠻹，如果當局真係畀咁做，就發過豬頭了。」

朋友說﹕「你估我哋不想全公開發售咩，乾手淨腳，唔使做嘢，淨袋錢，幾咁疏乎，問題係證監唔批之嘛。𠵱家天一半，地一半，手花又唔齊，又派唔晒出街，唔知點算好。」

我說﹕「你估當局不知道，如果任由市場力量，free float隻股票，唔使兩日，肯定跌到阿媽都唔認得，所以當局先至死都唔肯批全公開發售之嘛。」

所以呢，我覺得，當局根本就是自欺欺人，因為股市沒有莊家，散戶會輸得更甘，市場也會隨之愈縮愈小。不過，同從來不炒股票的小市民講，莊家萬惡，要拉晒佢哋，在公關宣傳上，很受歡迎，咁大家咪樂於繼續自欺欺人下去囉！

新股不准配售最公道

其實，做新股全部公開發售，完全不准配售，是最公道的做法，在幾十年前，一直都是這樣的，不過後來發現行不通，皆因沒有一些cornerstone的長期投資者，買了作中長線投資，股票根本就無人買，除非是在牛市三期啦。嗱！呢啲咪圍飛囉。

但這些基本道理，同小市民講，有理也講不清。當局說圍飛不合法，不妨又同公眾講一下，點解不搞全公開發售吖？先前曾經有過一隻申請過，ban咗𠻹呀！其實大家都心照不宣，股市就這是這樣運作的，不過小市民太無知，咪學天地會的陳近南咁，一路呃住佢哋囉。

[周顯 投資二三事]

https://www.mpfinance.com/fin/columnist2.php?col=1463481127012&node=1507750080691&issue=20171012