業主懵盛盛 造就炒家發大達

【明報專訊】當經濟不景時，究竟商舖的租金會不會減呢？答案是不會的。

通常，經濟不好，零售業不景，商舖還會照舊加租，租戶梗係提出抗議啦，但抗議無效，最多減少少，租戶計過數，梗係做唔住，唔續租啦。這時，地產代理正式做嘢，不停地搵客睇樓，當然也繼續租不出啦，過了幾個月，業主漸漸發現不對頭，短租都殺，收番少少成本都好……

到了最後，業主終於低頭，大幅減租，但已經失去了一年以上的租金。這又有什麼相干呢？地產代理賺到了他們的佣金，繁榮了經濟。

所以，那些收租的老手，例如我的拍檔筆華棋的父親鍾仔，是十幾億身家的收租大王，對，筆華棋自稱是富二代，其實他屋企都是十幾億身家的窮人啫！某名富豪在幾年前說過：「無100億身家，都唔好埋嚟呢張枱食飯！」

平租無關係 最緊要租客夠穩陣

鍾仔說過，我哋呢啲收租嘅，最緊要搵長租客，張約要夠長，交租要準時，租客夠穩陣，收平啲租無關係，費事麻煩最重要。所以，他的商舖租客都是匯豐銀行，豪宅租客都是大機構高層等等，經濟不景時，照樣有租交。

不過，話說回來，有一些業主，永遠不轉租客，個舖升值咗好多倍，自己都懵盛盛，不知其內在價值，淨係租畀個租客賣鹹鴨蛋，咁梗係交唔起租啦！結果，有個客出高價少少，便把舖位賣了出去，結果個新業主踢走個舊客，找了一個新客來租，租金升值幾十倍……十幾年前，灣仔啲舖，咪咁轉手咗好多囉！好多專業炒樓人士，都係靠找這些懵魚業主發達架咋！

如果你問我，應唔應該加租踢個舊租客走，我會答：「你應該要好熟悉個市場，花多啲時間去研究，唔好淨係坐喺度收租。」

[周顯 投資二三事]

http://www.mpfinance.com/fin/columnist2.php?col=1463481127012&node=1482087465868&issue=20161219