同外行人傾刁嘥時間

【明報專訊】前些時，有朋友介紹，說傾一單買殼刁，平時我都好少去傾買賣殼，因為太多non-professional，嘥晒時間同口水，不如睇番場戲好過，不過這次的中間人是位老朋友，雖然是行外的凱子，但盛情難卻，也要應酬一下。原來這位「買家」是一位名人，他提出來的所謂「刁」，居然是希望藉着自己的名氣，要別人送一隻殼給他：「我入咗嚟，啲股價升值咗，你沽出股票，咪賺大錢囉！」

所以我最憎同呢啲人傾刁，因為他們常常看新聞，看到別人的財技運作，便當是真的，但對方在桌底下的交易，卻完全不知道，這好比看武俠片看得太多，以為戲中表演的武功全是真的，誰知全是特技。

正是由於市場上同類的盲毛實在太多，所以我才咁憎同啲行外人傾刁。這好比說，常常有人問我：「你有沒有平殼賣呀？」遇上這種盲毛，我會直接回答：「有平殼，我自己都買咗啦，幾時輪到你呀？」

最歡迎水魚客

什麼客我才會最想聽到呢？答案是：「我有個水魚客，想買隻殼，佢急着要，貴啲都唔怕，最緊要快，同埋夠乾淨。」這又好比賣貨給老闆，如果你整個power point畀佢：「呢件嘢好正，有幾多幾多利潤，好多人爭住買，𠵱家係明益你㗎。」肯定老闆連聽也不想聽。你應該說：「個賣家就死㗎喇，你今日唔幫佢，佢聽日就無命，你想點殺價，任劏都得。」這樣子，老闆或許有興趣聽。

說回那單刁，那位仁兄說：「十幾年前，人哋都送咗隻殼畀我搞啦。」我心想：「第一，十幾年前，一隻創板殼1000萬，家陣3億半，點比呀？再講，十幾年前，1000萬嘅殼，你都搞唔掂，最後要畀返個殼主，今日你都不復當年勇，又憑乜叫咁高價呀？」

[周顯 投資二三事]

http://www.mpfinance.com/fin/columnist2.php?col=1463481127012&node=1481828362760&issue=20161216