最活躍莊家身家有幾多？

【明報專訊】最近有人問我一個問題﹕香港最活躍的一位莊家，也即是證監會的「頭號通緝犯」，究竟有幾多身家？

我搔頭說﹕「這問題好難回答噃！他揸住十幾廿隻殼，好多隻都百幾億市值，帳面身家一二千億閒閒地，不過這些都是帳面數字，股價可能要折讓九成至沽得晒，咁佢啲公司又有好多現金，自己手頭都有唔少，但又爭落唔少孖展數，好多仲好高槓桿添。所以，他有幾多身家，連他自己都唔知道，更加莫講話外人了。」

只花錢買股票 不懂享受

不過肯定的是，他賺錢雖多，但全都用來夾疊上，買更多的股票，把股價炒到更高，生活享受不是不愛，而是不肯花錢，所以，如果講到生活質素，我分分鐘仲好過佢。

前些時候，和一些股票界的同行匆匆走了一趟東京，有人說，東京的米芝蓮餐廳是全球最多的。我回答說﹕「這原因很簡單啫，東京人口是1300萬人，在巴黎和倫敦之上，人口多，星級餐廳自然也多，這是不易的定理也。」

東京有很多很好的餐廳，但我最想吃的，還是地道的小食，我手頭有一本書，專門講哪裏有好吃的大碗飯，很想一一去吃遍。其實，我對於fine dining的興趣不大，反而是大塊肉大碟飯，更能引起我的食慾，不過奈何fine dining的資料有很多，民間美食的資料卻難以蒐集，得問當地人才可以知道。

如果論到大碗飯，我最欣賞的是奧沢站入船的醃漬吞拿魚飯，諗起都想食，不過賣7000円一碗，好多捨得吃幾萬元一餐壽司的朋友，都不捨得吃幾千元一碗的飯呢！

[周顯 投資二三事]

http://www.mpfinance.com/fin/columnist2.php?col=1463481127012&node=1481654990654&issue=20161214