富二代股票永遠不炒

那天說起一隻股票，我皺眉說：「這是一隻老牌股票，大把物業收租，也有地產發展業務，但從來不炒，遠遠低於資產淨值，你不可能買到大量股票，買了之後，想套現時，也不容易沽出。」

對方說：「但現在第二代接棒，老竇唔炒股票，可能阿仔炒呢？」

我說：「第一，我既認識其老竇，也認識其阿仔，老竇在三十年前是炒股專家，在股市上賺了很多錢，但在這三十年，已經轉型地產發展，揾真銀，不炒股票了。第二，富二代是從來不炒股票的，嗯，至少是從來不炒家族的股票。」

對方不明白：「為甚麼呢？」

我說：「炒股票需要很廣泛的人脈，但是人脈需要很多次的共同做賊，才能逐步建立，但富二代多數是失匙夾萬，又無錢，老竇又唔信他，很難有錢和有很多job去逐步建立人脈。」

富二代股票可能抵買，但永遠不炒，不少沽不了貨，買貨都有困難。

對方點頭說：「我都知，建立炒股票網絡要花好多錢同心血。」

我說：「富二代通常好孤寒，因為父母一定從小教他，不要被人呃錢，他又會很小心，不會隨便被攞到着數。反而是白手興家的富豪，才會明白小財唔出，大財唔入，肯花錢買人心，這才可以建立到炒股票的網絡。再講，如果我係老竇，都唔想個仔炒股票啦。」

對方問：「何解？」

我說：「炒股票是刀頭舔血的玩意，雖然好容易以小博大，但是也可能會坐監……雖然，搞地產發展都有人要坐監，但這只是前幾年發生過，但這只是很罕有的個別例子而已。再講，炒股票也會令身邊朋友輸錢，自己未發達，就話乜都做，無惡不作啫，已經發咗達，就無謂要子女去搏命啦。」

朋友恍然大悟：「所以富二代個個專心做地產發展，很少落場炒股票。」

我說：「咪係囉，你睇四大家族的第二代，就算是次一級，只有幾百億身家的富豪，第二代都唔會做莊炒股票，個個都是乖乖仔，跟住老竇打工，收幾萬元一個月人工，學做地產發展，一步一步咁爬上去，三十幾歲開始接班。在香港，梗係搞地產發展先至係正路，炒股票係偏門，無人想個仔入偏門格。」

對方說：「咁又係，地產發展好像做軍閥，向人民徵稅，是合法的搶錢，做莊家炒股票，只是做土匪，咁梗係前者好啦。」

我說：「所以記住了，股票越老牌，越是不炒，富二代接班了，更加不炒，如果你買了大生地產，華信地產這些富二代股票，可能要等幾十年，先至等到一次沽貨的機會……話時話，要買齊貨，也不容易，我曾經企圖收集過華信地產，不過買了一個月，一股都買唔到，所以也都放棄了。」

如果要總結以上的結論，我會說，新上市的富一代股票，當炒，但可能會蝕到你趴街；富二代股票，抵買，股價永遠低於資產值，不過永遠唔炒，不止沽不了貨，連買貨也有困難。

http://eastweek.my-magazine.me/main/57990