搵人頭難 搵死士更難

【明報專訊】那天講起創業板新股動不動就升幾十倍，我說：「你估很容易？這種技術以前是不存在的，所以以前創業板新股最多升幾成，跟着是幾倍，是近幾年，莊家的技術進步了，才新進化出來，可以升幾十倍。」

對方不明白：「唓，有得幾難？只要自己人揸晒，100張飛全部配售晒畀自己友，咁咪要升幾多，就升幾多囉。」

我說：「你估真係有咁多自己人咩，人頭都係人，都要賺錢㗎。記得以前搞IPO，1個燈頭搵20個人頭，1個人頭出幾千元去拿配售，上市後升返一成至兩成，當日沽出，個個賺一千幾百元，好容易管理啫。但係如果一升幾十倍，如果人頭把股票沽出，個個都賺到十幾萬元，100個就係千幾萬元了。炒一隻IPO的利潤，咪得嗰幾千萬，如果畀人頭賺咗千幾萬，咁點做生意呀？」

對方說：「咁將股票配售畀絕對聽從指揮官操縱嘅死士，咁咪得囉。」

我說：「講就易，你去搵100個死士畀我睇吖。付出幾千元，當個人頭，賺一千幾百，都係屬於無錢嗰類，家陣有十幾萬元執，賺咗你又奈佢哋唔何，你話點管？」

對方說：「咁即係點？」

儲夠死士 新股上市一飛冲天

我說：「咁都係要搵死士，不過難搵啲啫。你做一隻新股，搵二三十個新人頭回來，那些唔聽話的，永不錄用，聽話的留低，幾年下來，咪有咁多死士囉。所以，𠵱家有本事做到新股上市，一升便是幾十倍的，全都是大集團，因為他們貨如輪轉，有好多budget，以戰養戰，才有本事做出大量基建，整咗好耐基建，先可以做到升幾十倍的效果。」

對方說：「咁即係話，一個新入行的莊家，是做不到升幾十倍的效果，因為沒有基建。」

我說：「Absolutely。」

[周顯 投資二三事]

http://www.mpfinance.com/fin/columnist2.php?col=1463481127012&node=1473018819595&issue=20160905