怕被人吃殼 結果被斬倉

在農曆新年，和一位莊家吹水，他說，「恆發洋參」(911)曾經找過他融資，但卻被他一口拒絕了。

他說﹕「隻股票炒到百幾億市值咁高，被人一下子斬倉，gap down掟下來，輸得好甘。」

我說﹕「就是因為它gap down掟下來，中間完全沒有人買到平貨，所以一旦反彈，就彈足幾倍，升勢好勁。」

他說﹕「一睇個盤，就知是畀人有心靠害啦，如果要斬倉，跌到1毫子左右，已經大把人接，乜嘢錢都還晒，使乜gap down到仙幾？」

我說﹕「其實，這些不專業的老闆，最鍾意把手上的股票，分按給十幾間股票行，只要一間call孖展，便會火燒連環船，咁多個倉一齊爆。」

某君插口說﹕「點解他們要分開咁多個倉借孖展？」

我說﹕「第一，分開倉借，可以借多好多錢，這好比你同一個friend借錢，最多借幾十萬，但如果分開同十幾個friend借，隨時借幾百萬都得。第二，好多莊家驚死畀人食咗食殼，所以便不敢把控制性股權抵押給同一個貴利，但誰知，結果會更大鑊。」

然後我們又講到個市將會幾時好返，莊家說，我估六月左右啦，我說，我都係估在五月，總之，呢個市，大家都唔做嘢住，免得多做多錯。

某君問﹕「咁咪好大鑊？」

我說﹕「唉，個市有大跌，先至再會有大升，到時先至係我哋贏錢的大好機會嘛。1997年大跌，1999年咪賺大錢囉，2003年見底之後，咪連炒足4年囉，2008年金融海嘯之後，又有好幾個friend發達。話唔定下一個浪，發圍兼起啤的是我們呢！」

本文章由作者為橙新聞獨家供稿，文中觀點僅屬個人意見，不構成任何投資意見。

作者簡介：

周顯，著名的炒股理論家，吃喝玩樂家，不著名的歴史學家、政治學家，過去還曾經當過社論主筆和武俠小說作者。

http://www.orangenews.hk/finance/system/2016/02/11/010028429.shtml