收到5萬 竟是Deal of the year

【明報專訊】昨天說到中國天化工(0362)，忽然想起了一個故事(別問我為何想起這個故事，因為一講人名，就會涉及誹謗，但行內人應該知道我說的是誰)。

話說在10年前左右，有一間叫「X泰」的公司上市，阿某君說唔夠飛，叫我搵基金圍咗佢。我心諗，個市都好差喎，呢單刁都唔易做。但找了幾日，總算找到老友，同我搞掂咗幾千萬。

於是，我就同某君報喜訊啦，誰知某君說：「對唔住，我已經搞掂咗，唔使你嗰幾千萬了。」

結果是，他醒番5萬元給我，當利市。我心想，搞咁耐，得五皮嘢，當我乞兒呀？不過有鑑於好多老闆，做好耐嘢，一聲唔該，white do，五皮嘢都算是有好過無，媽媽聲咁收錢啦。

獲邀做上市公司主席

事後，我把此事，同一位同某君相熟的仁兄講，他笑着說：「你從他的手上收到5萬元，都算是deal of the year了。」

後來我同好多人講起這件事，竟然個個都讚我叻仔：「嘩，你咁好嘢嘅，從來無人能夠在他的手上賺到佣金，仲難過賣殼收幾百萬佣金呀，你真的是叻到無人有！」

於是，這單刁居然成為了我做中間人生涯的最得意傑作，一說出來，行內人人都佩服到五體投地。大家是不是覺得不可思議呢？但向天發誓，這是事實！

最後一提，那位「同某君相熟的仁兄」，本來是個打工仔，過了沒兩年，也都發了達，賺到了十幾億，仲邀請過我做上市公司主席添。不過，想到主席位必定也是孭鑊位，可能更加是坐監位，所以我都唔敢應承了，除非佢畀番三幾億golden hello過嚟先啦，不過，如果成事，這又將會是另一單deal of the decade了，這又怎會有可能呢？

[周顯 投資二三事]

http://www.mpfinance.com/htm/finance/20160226/columnist/en30_en30.htm