懶蠢代理應即炒

【明報專訊】有天我和一名地產經紀吹水，問他為何貼在櫥窗的賣盤價格老是不變，他的回答是﹕「衣家成日劈價，價格成日都改，點改得咁多？不停印仲浪費墨水添，不如等顧客入門，要睇樓，先至同佢講個最新價。」

我心想，唓！乜衣家你哋好多樓睇咩？咁得閒，都唔去改新價，再講，改新價，用紅筆打交叉，寫過上去咪得囉！你呢種人又蠢又懶，抵你成世做loser。

跌市勤改價 方可吸引買家

其實賣盤價格不改，是以前的慣例，因為當時樓價日日升，用不着日日改價，不如用平的舊價，吸引了顧客進門，才同他Sell新價，在銷售方面更為有效。記得那時我睇樓，都成日被廣告登的假舊價騙到啦！

但是在樓價劈價的時代，就要日日去改價，有時個賣家都未劈，已經要代他先劈，頂多加上一個「試」字啫。如果我係老闆，見到呢D咁懶咁蠢的經理同代理，索性成team炒晒，cut埋個舖，慳番D米飯。

日前走了深圳一次，照舊又吃了一次肥佬餐廳的椰子雞煲，這是我百吃不厭的美食，至今連自己家裏也懂得照辦弄來吃了，但到深圳時，永遠還是忍不住試試它的超有雞味的走地雞。

老闆是印尼華僑，其實我已找到一家上市公司，為它在香港開分店，但是上市公司職員約了我幾次去試吃，我因太忙沒空去，所以很覺得對老闆唔住。不過老闆大把錢，剛剛送了個仔去美國留學，唔介意啦。

它位於沿河路錦星別墅區，即文錦渡口岸斜對面，在幾個月前，曾有個文錦渡中港牌放盤，賣158萬人仔，我想一想，為常常吃雞煲，省來回1.5小時的車程(我的西部通道牌要繞遠路)，值不值得呢？結果不用想，這車牌很快給人買了。現在又有人sell我一個連沙頭角、文錦渡、皇崗、西部4牌齊，一lot過出售，「只」賣440萬人仔，唉！呢個時世，邊得有咁多錢吖？

[周顯 投資二三事]

http://www.mpfinance.com/htm/finance/20160203/columnist/en30_en30.htm