寒冬不是炒股天

前幾天，同人討論某個炒股項目，我說﹕「其實而家乜都唔做得住，踏入2016年後的炒股經驗告訴我，就算有100分的利好消息，再加上往績殺聲震天的團隊，一旦搭棚炒股，都會被散戶炸到失魂。聽我的勸告，千祈唔好做嘢住。」

他很不忿氣地說﹕「其實因乜解究香港會跌得咁勁？樓又跌，股又跌，內地明明是震央，都無香港跌得咁深。」

我說﹕「這是因為聯繫匯率，港元一直在升值，如果把匯率因素也計算在內，香港樓根本沒有跌過，因為人民幣兌港元跌得重深，港股就只係跌咗三成左右。」

他說﹕「然則，你即是說，港樓同港股仲有排跌？」

我說﹕「我不敢說，不過，客觀的事實是，港元的確好強，香港所有的資產都是好貴，但是，或者美元會守不住，跌返落去呢，我哋又點知呢？」

他說﹕「但是美國經濟好強噃！」

我說﹕「這個肯定有灌水成分。全世界的經濟都咁差，有乜可能美國會一家獨好吖？美國從來就是世界的經濟火車頭，同每個資本主義國家都有很多的interaction，是大部份國家的前五大貿易伙伴之一，如果全世界都衰而美國可以獨自繁榮，這違反了經濟常識。」

他說﹕「你的結論是，我隻嘢搞唔搞得？」

我說﹕「你想炒高隻股票，隨時都得，不過如果要出貨，就無乜可能了。反而是，如果你炒大了成交，原股東仲會出來炸你添，因為這本來是無人記得的倉底貨，你一炒，反而喚醒了他們的記憶，重衰。」

他說﹕「不過我重見到好多莊家繼續炒股票。」

我說﹕「原因有很多，例如說，隻嘢跌得太深，偶然都要炒一炒，否則變仙股都似。又或者，他借了孖展，所以必須頂住股價，免被斬倉。又或者，佢真係好有錢，而家先炒高，等個市好返，有散戶入場，先至派貨，咁個節奏可以快一點……有一百萬個理由，可以在熊市炒股，不過你隻股票，都係等幾個月，個市好返先啦。」

本文章由作者為橙新聞獨家供稿，文中觀點僅屬個人意見，不構成任何投資意見。

作者簡介：

周顯，著名的炒股理論家，吃喝玩樂家，不著名的歴史學家、政治學家，過去還曾經當過社論主筆和武俠小說作者。

http://www.orangenews.hk/finance/system/2016/02/16/010028565.shtml