股壇貴利的business model

我沒有細心研究過「恒發洋參」(911)，但在它暴跌九成當晚同一位活躍市場的莊家吃飯，他說：「好明顯是有人想  咗隻殼，夾硬沽空佢，因為百億市值嘅主板，跌三成已經有支持，可以慢慢沽，尤其是跌到1毫子左右，通常會有好多人出來買，而家只有一億元成交，但跌咗九成咁多，即係不合理性，斬倉後間行連本都攞唔番，唯一的解釋就係有心做個老闆世界，所以借貨沽空佢。」
我回家略略一看它的基本資料，去年9月中期報告有盈喜，派息1.2億元，在9月之前，大股東又一直在增持，似乎不像缺水到要被斬倉喎……但反過來說，斬倉的原因，也許正是因為借了孖展來增持！
有位網民則說：「其實啲投行將抽嘅股一次過沽做咩？一齊死？認咗有抵押，好明顯有人知道咗佢抵押咗幾多同貨放喺邊間證券行，跟住沽空，然後追收佢抵押返嚟的錢的差價，由於補唔切倉，證券行沽佢抵押的貨嚟填數，成件事有人精心部署，手法好似X生X太。」

這位網民意見可能代表很多散戶想法，但大家對於X生X太的business model也許完全不熟悉，只是以訛傳訛，亂說一通罷了。
我在《炒股密碼》寫過，作為一個股票的金主，提供貴利服務給莊家，抵押品是控制性股權，基本上，他/她已相等於是股票老闆，債仔天天搏命炒股票，最終只是還利息給他/她，等於幫他/她打工賺錢，那又如何有斬倉/搶間上市公司回來的必要性呢？通常作為一個大金主，手頭最少有幾隻殼，甚至是幾十隻殼，是借錢的抵押品，如全都斬倉，相信他/她都好惆悵，好比銀行拿著很多客戶的房子，它絕不會希望它們不還錢，因房子一旦全部上身，反而是銀行災難。簡單點說，一間貴利公司主要經營模式就是放數，所以必須建立良好的信譽，才能夠客似雲來，一年20%至30%的利息收入，去邊度揾？一旦試過一次斬客戶倉，相信所有客戶都雞飛狗走，以後仲邊有人敢同他/她做生意？
反而是那些標榜低息，而手上只有一兩個客戶的小型貴利佬，而且還是剛剛加入貴利行業不久的賊，才會熱心於把客戶的殼吃掉，因為他們的機會成本不高，而且手頭也沒有殼，所以特別垂涎。如一個大金主，手頭有幾十隻殼做抵押品，幾時想攞隻來玩，個債仔都搶住奉上啦，使乜食人隻殼咁低莊呀！

作者為小說作家、報社主筆、股票投資者，吃喝活樂的專家。
逢周一、三至五刊出

http://www.am730.com.hk/column-300602