殼王日日返TVB𥄫住

【明報專訊】那天去朋友的公司吹水，他說，現時「殼王」陳國強日日要返電視廣播(0511)，因為業績實在太過不濟了。朋友補了一句﹕「不過他返都無補於事吖！有心殺賊，無力回天！」(我心諗，你隻嘢，真唔抵得你咁好中文！)

我說﹕「他日日返工，就算挽救不了收視和業績，至少可以防止手下偷錢。」

這名做了幾十年影視的朋友說﹕「影視界要偷錢，外行人點防？邵逸夫方逸華就得，陳國強點識咁多(行內嘢)呀？」

我說﹕「就算無得防，𥄫住至少可以偷少啲，如果唔睇實，無掩雞籠，偷得仲勁。」

朋友說﹕「一日都係當日方逸華執靚盤數來賣，殼王睇住盤數來買，就中伏了。」

我說﹕「佢咁有錢，唔緊要啦，做唔落去，阿爺都會包底，黎瑞剛有料到嘅。」

亞視歲月留聲最好睇

說到TVB，我記起前幾天，我同一名前度手下食飯，她說日日睇電視，最憎梁振英的原因，是因為他不准王維基開台。

我說﹕「我最憎睇王維基啲劇，睇得好吃力，睇少一集都唔知講乜。TVB的劇有個好處，幾時插入去睇，由邊一集開始睇，斷咗幾集又睇過，都可以睇得明。返屋企睇電視想乜？想簡單唔使用腦之嘛，如果要帶腦去睇電視，我唔好去睇電影？」

她說﹕「不過TVB啲戲真係愈來愈差。」

我說﹕「所以我都唔睇TVB，最鍾意睇歲月留聲。」

她說﹕「我都是。」

我說﹕「所以，王維基開唔到台，對我們沒損失，但亞視執笠，歲月留聲無埋，才是最大的損失。」

[周顯 投資二三事]

http://www.mpfinance.com/htm/finance/20150915/columnist/en30_en30.htm