唔同窮人來往 注定冇運行

【明報專訊】前幾天，我和一個朋友吹水，講到了一名富二代。這位哥仔以往都有唔少動作，但是，家陣究竟做緊啲乜，就無人知了。

朋友說﹕「佢根本都唔係做生意，而是炒來炒去，本來低價入股了好多好公司，如果揸到今日，有錢過好多富豪，可惜他賺少少就賣掉了。說穿了，他根本睇唔起大陸，唔鍾意同大陸人做生意。」

我說﹕「他鍾意鬼佬，想攀上鬼佬富豪。點知鬼佬又唔當佢係嘢，所以無辦法。」

朋友說﹕「這是因為他投資失敗，咁多年一事無成，鬼佬梗係睇佢唔起。」

我說﹕「最衰佢仲好寸，個個都得罪晒，佢想同人來往嗰啲，人哋唔蘇佢，人哋想攀附他，他又唔蘇人，唉！其實在商界，永遠都係有錢人去搵窮人笨，去賺窮人錢，你唔同窮人來往，肯定無運行，咁點發達呀！」

朋友說﹕「睇下佢今後炒嘢賺唔賺到錢啦，如果賺唔到，佢老豆一旦息勞歸主，相信佢都好無運行，隨時嗰啲畀佢寸過嘅人，都有錢過佢。」

我說﹕「不過他都好有錢，生活都係富豪級嘅，好過我哋多多聲啦！」

外國貴族學校 實行古法教學

那天看新聞，看到城市大學的創意媒體學院副教授魏時煜(Louisa Wei)博士不准學生在課堂使用手機，我心想，這是古法教學，我鍾意呀！

其實外國有好多學校，用傳統的教學方式，上堂要堅背好多書，還完全不准用電子用品，這種都是貴族學校，學費仲貴到無倫，如果我有仔女，實送去這種學校讀書。

[周顯 投資二三事]

http://www.mpfinance.com/htm/finance/20150914/columnist/en30_en30.htm