細價股大莊 下場如天國與地獄

【明報專訊】日前同人講起幾名細價股大莊家，其下場之不同，有如天國與地獄，當然也證明了有的人有智慧，有的人則太過貪婪，利令智昏。

首先從A君講起，他在全盛時期，有十幾隻殼，公司有幾十億元現金，後來做錯幾單交易，輸了20幾億元，現金周轉不過來，結果東窗事發，後果非常大鑊。

我的問題是：「其實搞細價股，不外乎供供合合，偷錢到自己袋裏，怎可能一家公司有10億元以上的現金？他是想做大世界，搞大刁，想升呢，才會把上市公司搞到這個田地。」

朋友說：「對呀！那時他又捐錢又盛，要做社會賢達，去美國見大基金，做road show，恥笑我們這些細價股莊家𠻹！」

我說：「如果佢哋好哋哋炒下細價股，咪好囉！你看那些大賊，躲在背後做mastermind，到𠵱家都未出事啦！但佢要扮上流，一係就斬手指戒細價股，淨係玩老正，就邊個都奈佢唔何。可惜佢十幾隻殼，隻隻互控，互相借錢給對方，外表升呢，內裏仍然係細價股玩法，咁就肯定出事啦！」

朋友說：「阿邊個以前夠係殼王啦！你睇佢，一個樓盤賺幾百億元，𠵱家都逐隻賣畀拍擋，都費事玩細價股。」

跟着我們又講起阿某君，他都是炒細價股出身，𠵱家都轉玩地產了。

我說：「好心佢升了呢，做咗社會賢達，就唔好玩細價股。今日睇唔慣人哋喺細價股賺錢，自己又要再投錢落海，如今惹上大麻煩，又何必呢？」

以上人物究竟是誰，大家估吓啦，我不能說了。

[周顯 投資二三事]

https://www.mpfinance.com/fin/columnist2.php?col=1463481127012&node=1532890242448&issue=20180730