內地人存錢 無助港繁榮

【明報專訊】朋友說，現時內地富人都不敢把錢存在北京及上海了，而是紛紛把錢存在山高皇帝遠的深圳，所以深圳的經濟才這麼繁榮，樓價才會猛升完又升。除了深圳，就是香港，總之是深圳香港兩邊走啦。

我說，我都知𠵱家深圳好繁榮，不過香港，我唔覺噃，我識得啲朋友都好窮，差啲陷入赤貧𠻹。但話時話，1995年時，香港好繁榮，不過我都好窮，呢啲係個人關係，同大市無關，再講，在香港的內地人其實同香港人圈子分開，大家河水不犯井水，所以他們發達，也同大部分香港人毫無關係。

在港內地人 河水不犯井水

正是有一天，我同朋友講起啲friend好窮的問題，朋友問我，佢哋點窮法，我想了一想，說：「阿梅某某，本來想買架法拉利，點知因為股市唔就，所以只買了一架瑪莎拉蒂就算了；阿JC君，買咗一架全新的七人車，都仲未請司機；仲有一條友，剛剛買了一架勞斯萊斯，都要等減價先買，仲要唔係長陣，普通的碌死老鼠之嘛。」朋友笑說：「你這番曬命話，好似我有一個朋友，大叫好慘呀，我問佢點慘法，他回答說，慘得過我有錢！」

我說，我剛才只是講朋友的狀况，沒講我自己，所以唔算曬命。我自己都好耐無買過嘢，差啲連「靴勿士」都要取消我的VIP記錄，有朋友仲趁火打劫，想話廉價買我啲藏酒𠻹……咁講法，唔算係曬命啩？

還有就是，本來我一直扮有性格，很少出席公開場合，而且從來不去書展，但這一年都要去一次，除了簽名之外，還可能講十幾分鐘嘢𠻹。無辦法，朋友求到，盛情難卻吖嘛，不過我已經有十幾廿年沒有去過書展了，因為好憎去人多的地方！

[周顯 投資二三事]

http://www.mpfinance.com/fin/columnist2.php?col=1463481127012&node=1469125256643&issue=20160722