證監吃交易所 港股A股化

【明報專訊】話說證監會打算吃掉交易所，星期三那天，我和一位上市公司老闆吃飯，他說：「唓，其實咪即係變咗同A股一樣囉，呢種制度，香港人不習慣，但大陸人習慣晒，這就是港股A股化的一部分。」

他講到興起，說下去：「我隻股票給了一個大陸莊家炒，你知啦，A股不准亂發新股，所以A股莊家的炒法，是炒高炒低，在波幅之中賺錢，完全唔使沽貨。你睇我隻嘢，呢幾個月炒高咗幾倍，其實一股都無沽出過，但都賺了唔少錢。」

我說：「炒波幅的利潤點及得上沽股票呀？」

他說：「咁就梗係差好多，但是A股的市值拿埋幾十億，如果識炒，都好和味㗎，不過要求的技術含量當然高好多啦。」

A股化益晒大陸莊家

我說：「唉，不過馬死落地行，過兩個月，新例都會限制發新股，印股票都無以前咁容易，看來遲啲我們都要學大陸莊家的炒法了。」

他說：「人哋炒咗咁多年A股，我哋呢啲老狗，要學都學唔來啦。總之，港股A股化，就是益咗大陸莊家，他們都習慣晒這種炒法，再講，他們的人頭都是dai lulu（大陸佬），就算日日炒死一隻股票，車出車入，證監寄信來查，掉咗封信就搞掂，根本唔使理證監，點好似我哋咁，做少少嘢，又要拉又要鎖，唉，香港莊家都無晒競爭力啦。」

我說：「所以我哋要乞米，因為無工開。」

他說：「不是我哋乞米，是你乞米，因為我有兩隻殼，都打算找大陸莊家炒，最多我賺少啲啫。但你手頭無殼，無工開，就注定乞米嘞。」

我心想：咁我可以買你隻股票啫；但沒說出口。

[周顯 投資二三事]

http://www.mpfinance.com/fin/columnist2.php?col=1463481127012&node=1466709867931&issue=20160624