灣仔區全港最多「賊」

【明報專訊】有一個朋友問我，在香港，最多賊的地方是在那一個地區？他的答案是﹕灣仔，因為在這裏的上市公司總數目，遠遠多於在中環。他的說法是﹕「好多時，一個單位之內，已經有幾家上市公司！」

我恍然說﹕「怪不得根據統計，灣仔人口的收入，是全香港最高的。」(按﹕收入好像是按居民的收入計算，和商業無關㗎噃！)

所以呢，其實香港班金融賊，主要的中午飯地方，多就灣仔的幾家高級食肆，我說﹕「中環食晏，又塞車，又無車位泊，又多人，幾咁唔方便呀！」不過，其實最大的賊，都是身在中環，例如那些外資大行，以及藍籌股的總部，多數在中環。他們食的是大茶飯，那些細價股莊家，不過是在屋邨搵食的扑頭黨而已。

近10年細價股市場 強者愈強

其實，在近十幾年來，細價股的最大變化不是殼價上升，而是壟斷和集中，因為大家發現，原來同一個老闆擁有好多隻細價股，可以享有規模效應，無論是供股集資、炒作股票、投錢過紙，都方便好多，所以，在細價股的市場，變成了強者愈強，一個人擁有十幾隻殼，像集郵般，愈集愈多，也變成了市場上普遍見到的事。星期日，有個friend約我去上海玩，我的回答是﹕「我份人好高級，要坐私人飛機先至肯去。」其實，坐私人機去上海，都係廿幾皮啫，呢條友完全畀得起。難得有人肯照，梗係有風駛盡啦！其實，私人飛機都唔係好好坐，頭等闊過佢，去上海的商務位又好窄，不如坐經濟艙好過……。

諗落最好就是坐經濟艙，條友將尾數幾皮，折現落去我戶口，不過我恐怕佢唔會肯。不過，我識得有個朋友，就專同新的女朋友坐經濟艙，他會對女友說﹕「其實我本來想同你坐商務艙，不過無謂使冤枉錢啦，嗱！如果你肯坐經濟艙嘅，呢度兩皮，你當係折現算啦！」根據他的說法，十個女仔，十個都會接受折現。那他有什麼好處？他說﹕「她收了Cash，咪同我攞少D零用錢囉！」

[周顯 投資二三事]

http://www.mpfinance.com/htm/finance/20151117/columnist/en30_en30.htm