去夜總會不是為了生果盤

我在幾年前來過壽司森，老闆之一就是我的炒股啟蒙老師Tony，幾年沒來，日前和一班老餅經紀聚會，重來光顧，赫然發現它已經開了幾間分店，性價比又幾高吖。於是，前幾天，又和梅偉森和渾水來吃，今時今日，當然是吃它性價比最高的330元午飯套餐啦，唔通去omakaze咩。

渾水提起某位少女，對其男友幾好：「她常常送小禮物給他，又畫了一幅畫送給他……」

我說：「你永遠要記得，彭浩翔套《大丈夫》，阿曾志偉講的金句，我哋唔係因為貪個果盤，而去夜總會，你年紀輕，經驗少，不要被女人的小小心意，就感動了，否則以後會被好多女人欺騙，不騙你的肉體，專騙你的金錢。」

渾水馬上受教：「願聞其詳。」

我說：「真正對你好的女人，在這個風雨飄搖的日子，應該共渡時艱，同條仔講，而家你咁辛苦，不如我出返來做嘢，幫輕吓你都好吖。或者我搬返去同阿媽住，等你慳返啲租。」

渾水說：「咁條女又無咁做噃。」

梅偉琛說：「咁佢至少有同男友上床，算是交了數。」

我說：「上床是普通朋友的行為，如果飲醉咗，周時都會執一劑架啦，所以同常蒲老蘭的女人拍拖，也常戴綠帽，是常識吧。反而是去佢屋企，煮飯畀你食、幫你按摩，又或者是去你屋企，幫你做晒啲家務，才算是親暱的行為。」

渾水說：「不過條仔都唔係對條女好好啫。」

我說：「咁就扯平，唔使計啦。總之，你千祈不要被女人的小恩小惠騙到，否則，你會死得好慘。」

今日的股票貼士是「壹照明」（8222），聽講會「即刻」落鑊炒，吓，有無咁快呀？不過此股在幾元的價位，跌至變成了毫子股，貼近52周低位，市值1.5億元，不講upside，downside應該是非常有限吧？少少地買返幾十萬股，上望升五成至七成，下守跌兩成至三成，應該是合理的期望值吧？

http://nextplus.nextmedia.com/columns/%E8%82%89%E9%A3%9F%E4%B8%AD%E7%92%B0/20160125/340818