上市科皇帝女唔憂嫁

【明報專訊】在除夕時，我和一位專門啤殼上市的莊家吹水，他嘆氣說，家陣對啤殼上市收得十分緊，好難上到市，「交易所收好多上市費㗎喎，乜唔通過，唔使揾錢㗎咩？」

我說：「我啱啱寫了一篇文章，講黑社會都係一門生意，江湖大佬的主要工作，就是揾刁做，有生意，咪有細佬跟囉。其實做交易所，都係一門生意，它一年預算上百幾隻股票，家陣完全夠晒飛，大把排緊隊，咪要手緊啲，費事上得太多，搞跌個價。你睇吓，如果個市唔得，無人上市，殼價又跌，嗰陣就會乜都放鬆晒，求神拜佛咁，四圍揾人上市添呀！」

他說：「你即係話，依家交易所上市科是皇帝女唔憂嫁，所以先至咁寸。」

我說：「咪係囉，家吓個個玩啤殼上市，剩係你一個人，都有四五隻排緊隊，你話唔收緊就有鬼嘞！」

收緊上市審批 免搞冧殼價

話說我同某傳媒寫稿，寫到啲知名人士，我都好謹慎㗎啦，用晒假名代號，誰知這間傳媒唔知做乜鬼，自己去估我想講邊個，又唔問我證實，就把自己斷估的人名寫了出來。一次係咁，鬧完之後，兩次又係咁，有無搞錯，如果我被人告，又或者係畀人斬，都係唯佢是問。從來搞傳媒，只有我寫得太白，編輯改了用假名，以免惹禍上身，這是常有發生的事；但我可從來沒有見過作者不寫，編輯連沒寫的名字，也自作聰明的寫了出來，為作者添加了麻煩，這種編輯，真的是聞所未聞。

單單上一次，已經有過一個百億富豪，找人來電，媽叉了我一大輪，從此少了一個老細。其實我寫稿，都算好好涵養，任改唔嬲，但呢次，我都沒法子忍受下去，深夜三點幾，打電話去大罵一場，炒蝦拆蟹，真的是有無搞錯。或者你們會說，為什麼你不停了那個專欄呢？我的答案是﹕依家係佢對我唔住兩次，如果我停咗專欄，咁咪無仇報？老虎都留住條線先！

[周顯 投資二三事]

http://www.mpfinance.com/htm/finance/20160105/columnist/en30_en30.htm