接配股不立刻沽 基本「禮貌」

【明報專訊】有很多時，我獲配售了一些股票，又或者是，常常有一些老闆說﹕「喂！阿周顯，等我醒番三兩球平貨給你，等你同我一齊玩吓啦！」

一般來說，我拿了這些股票，都不會馬上沽貨，原因很簡單，這是市場上基本的「禮貌」。當然也有一些朋友，收到平貨後，見到股價猛升，即刻沽貨賺錢，有時可以贏到一千幾百萬添。但通常馬上會接到電話﹕「你條……(下刪兩字)，你咁咪等於喺我個荷包度拿錢，你唔好直接叫我寫支票畀你！」

好多人都寧願為了錢，少了朋友，但我不會這樣做，所以我無人咁有錢，但襟撈好多。所以，我在收貨以後，很多時都是任由股票升到天咁高，都忍手不沽，除非它跌了下來觸及「警戒線」，非止賺不可，又或者是已經坐咗好耐好耐，一年半載，這時沽出，就算賺大錢，都叫做畀足面吖。

街上買街上賣 無道德包袱

簡單點說，如果你獲配新股，升10倍，你沽佢，下次你咪無份囉！但如果你次次都忍住手，次次賺一兩成，咁咪長做長有，而且愈配愈多囉！

有很多讀者不明白，為何我常常獲得配股，也往往不在高位沽出股票，咪因為咁嘅原因囉！因為我夠「安全」嘛！如果把股票配給了唔熟的人，你炒高十倍，他一下子炸下來，袋你1000萬事小，把股價炸下來事大。

不過，當然也有一派人，藝高人膽大，從來不要配售，例如說，梅偉琛就是這種人。因為市場的規矩是，街買街沽，他既然不是配售得來的股票，便沒有道德包袱，就算同個莊幾熟，兜口兜面沽你幾檔，你又吹咩，仲要等你炒到慶烚烚，先至去沽爆你，拆你棚都仲得呀！

[周顯 投資二三事]

http://www.mpfinance.com/htm/finance/20160107/columnist/en30_en30.htm