【明報專訊】年關將近，細價股市場仍然是drifting，即是陰乾，完全沒有散戶參與，好多隻股票都冧咗落嚟，莊家都爆埋煲。大家無心戀戰，炒鬼們痴痴呆呆，坐埋一枱，講的都是政治，林鄭同薯片邊個會當選，都沒有人談股票了。
前兩天，同朋友講起梁游事件，我笑說，他們犯的錯誤，是不懂中國的傳統文化，有一句老話，叫作「光棍打九九，不打加一」，簡單點說，就是當你同一個惡棍打麻將，你贏了好多錢，他正在開支票的時候，你還在開聲潤他：「乜你打得咁渣架，如果我係你，輸咁多，就無地自容嘞！」
輸家先至要罵人
惡棍已經輸到一肚火，又肉赤，聽見這句話，就梗係乘機唔畀錢，仲打你一身啦。所以，出嚟行嘅人，一定要畀輸家一條路去行，以免他發火發爛咋！
這個故事教訓我們，做贏家嘅，一定要謙虛，唔好貪賺埋口彩，否則一定會出事。如果你同惡棍打麻將，就算要潤佢，都要等收到支票，過埋數先好出口，否則自己會好蝕底。
所以呢，我永遠會話，loser先至要罵人，贏家有乜必要出口啫！悶聲發大財好過啦！所以我常常說：「被罵的人是有福的。」這也正如當年阿黃坤鋤大弟常常輸錢，口頭禪是：「施比受更有福。」
靠特首 不如靠自己
人們問我，最希望誰當特首，我回答說：「當然是希望我自己當！」其實，邊個當特首關我鬼事，我小時候，香港經濟欣欣向榮，父親卻生意失敗，王小二拜年，一年不如一年，這也令我得到了一個教訓，就是香港經濟好唔好，唔關我事，自己贏錢最緊要！我又唔會攞綜援，無住過公屋，又唔要全民退保，又唔想爭做地產霸權，有無民主都無關係（我甚至想過搬番大陸住𠻹！）與其靠特首，不如靠自己！
[周顯 投資二三事]
http://www.mpfinance.com/fin/columnist2.php?col=1463481127012&node=1485111670785&issue=20170123
沒有留言:
發佈留言