有一個叫「旅遊關公」的網絡作者，列出了「港人發夢都想移民？香港VS日本/六個生活上的差異」﹕
第一是服務，評分絕對係A+++，只係經過無入去都會同你鞠躬講早晨，如果係買野就直頭送到出門口，鞠躬鞠到你消失於眼前。
第二是餐廳食物總類，日本嘅專門餐廳多數都獨沽一味賣最招牌菜式，呢種堅持嘅心係香港真係唔係咁容易揾到。
第三是清潔度，日本係街嘅垃圾桶真係少之又少，小編試過拎住件垃圾由街頭行到街尾咁滯先搵到一千零一個垃圾桶，雖然係咁，但街上絕少垃圾，好多人都會帶返屋企，而且好好分類，環保意識好高。
第四是一路行一路食，生活忙碌嘅香港人好多時候都會為咗爭取時間而一路行一路係街食早餐，不過日本人寧願早啲起身係屋企食埋先出門口，因為佢哋覺得一路行一路食嘢係一件冇禮貌嘅事。
第五是公共交通工具，日本人公民意識好強，佢哋覺得讓座呢個行為會令對方尷尬，所以有時就算座位無人座，都會寧願企，等有需要嘅人士坐。而係香港呢，就算明明嗰個係關愛座，都會有啲人死都唔肯讓座。
第六是大時大節，香港放假或者繁忙時間去親公眾場合，就算係個地鐵站都好，都會逼到爆，過年去年宵呢啲就更加唔使講。日本同樣都好多大型活動，好多祭禮都勁多人，但每個人都好受規矩，唔會推撞，又唔會左穿右插，人與人之間保持距離。
我作為一個土生土長的香港人，兼且還是一個日本通，覺得這位旅遊關公只係見識少啫，講的嘢都不著實際。
我在九十年代移民加拿大，那時有很多香港移民，烈治文簡直是香港殖民地。香港人無論移民到了哪裏，都是做返香港人，用不著顧及對方的差異文化架噃。
第一講到服務，這些九十度躹躬的服務是違反人權，如果放在香港，老闆如此要求，賤格老闆被人放在網上公審似。
第二講到食物種類，香港人去到日本，常常要求日本餐廳提供乜都有的食物，所以磯丸水產這些大店，也特別受到香港人的歡迎。(按﹕近幾年的確少了，但以前有太多太多。)
第三講到清潔度，香港的厠所比內地也好不了多少，厠所「辣撻」似乎是香港的特色噃。
第四講到一路行一路食，香港人去到日本，都係咁架噃，日本間百果園，咪專賣串串生果給香港人一路行一路食囉，如果唔畀香港人咁做，香港人可能會大罵廿四噃。
第五講到公共交通工具，日本人乘車時連手機都唔講，以免搔擾到別人啦，唔通我哋又學他們咩！
第六講到大時大節，嗱，我講講本人的立場，就是最憎人左穿右插，但係自己就最鍾意左穿右插。所以真係無得講，我最鍾意日本，因為人人都不左穿右插，只有我一個人咁做，真爽！如果踫到另一人同我爭插，這個人一定是香港人，要不就是來自內地了。
本文章由作者為橙新聞獨家供稿
作者簡介：
周顯，著名的炒股理論家，吃喝玩樂家，不著名的歴史學家、政治學家，過去還曾經當過社論主筆和武俠小說作者。
本文為作者觀點，不代表本媒體立場。
http://www.orangenews.hk/finance/system/2017/01/17/010048858.shtml
沒有留言:
發佈留言