成立娛樂公司來溝女

有朋友想搞一間model agency，說穿了，不外是想溝女啫。他的說法是：「在商界行走，傾乜嘢生意都好，有女有得傾，無女無得傾，約老細嚟傾生意難如登天，但約老細來溝女，順便傾生意，就個個仆到來。搞間模特兒公司，三幾十萬啫，就算傾唔到生意，自己溝番兩條女，都可以返本啦。」

我說：「你開張搞模特兒公司容易，但你有job畀啲女咩？」

他搔搔頭說：「咪請個專人返嚟揾job囉。」

我說：「如果係咁，不如索性唔好做agency，直情做一間娛樂公司，簽啲女返嚟做藝人，咪仲多女！溝明星，個名仲好過溝model啦。」

他說：「做娛樂公司，成本咪好高？」

我說：「有得幾高？而家簽女做藝人，唔使出糧畀佢哋架嘛。總之，簽十幾條女返來，做一隊組合，是但揾個人作曲填詞，都係幾皮嘢，然後一個星期一次排舞練歌一個鐘，好平租場費啫，過得一年之後，先至出一隻單曲CD……使得幾多錢啫！」

他懷疑地說：「唔出糧畀啲女，有無人肯制呀？」

我說：「個個都肯制！家陣啲女咁恨發明星夢，唔好講話唔使錢，貼錢都制呀！」

他說：「咁佢哋點生活呀？」

我說：「做吓兼職模特兒，得閒做吓雞，又或者有男朋友包，咁咪得囉。」

他馬上興奮起來 :「做雞，我啱呀！佢哋唔使出去做mass market，淨係做我一個生意就得嘞。」

我們討論到興緻勃勃，誰知另一位朋友冷冷說：「呢一招啲橋咁舊，呢幾年已經畀人用到殘晒，無女上當架啦。」

我回心想想，身邊的確識好多女都已經是組合成員，如果要再找新女，恐怕真的很難。唉，在香港，要找出一條揾女的新橋，可能比找出一條揾錢的新橋，更加困難！

本周大市繼續低沉，講親的股票都輸，暫時不說了。

http://nextplus.nextmedia.com/columns/%E8%82%89%E9%A3%9F%E4%B8%AD%E7%92%B0/20150831/254705