溝醜女的社交禮儀

有一天，和小朋友渾水去參加一個聚會，那個聚會聚了很多女，我到場時，只見渾水和兩條仔，站在一角，正在喁喁私語地吹水。

由於我成日都要走幾場，所以坐不了多久，便散水了，趕去下一場。在事後，我在報館開會，同渾水開會，順便同他說﹕「喂，果日咁多女，點解你唔埋去，溝下女呀？」

他說﹕「嗰D女我唔係好啱。」

我說﹕「你唔啱都要過去吹幾句，咁先至符合社交禮儀嘛。」

他說﹕「唔係呀嘛，唔啱都要吹？」

我說﹕「如果唔啱，仲要揀最醜樣嗰個，坐喺佢身邊，同佢傾偈，咁先要叫做一個gentleman。」

他不明白﹕「點解要咁做？」

我說﹕「有時幾條女來聚會，坐埋一齊，自己有自己玩，寸寸咁，唔騷D仔，有男仔坐埋去，敷衍應兩句，眼尾都唔哨，呢D懶有嘢的女，是不是很無禮貌，很討厭呢？」

他說﹕「當然很討厭啦，我都成日畀人咁對住。」

我說﹕「所以一個淑女，就算D仔唔啱睇又唔啱嘴，應該禮貌地去聊天，而且日行一善，更加應該照顧那些最唔使恨的毒撚，就好似戴安娜王妃，專門去幫D愛滋病人，咁先至似貴族。」

他說﹕「咁如果有睇中了的美女，咁我係唔係仲要照顧最醜嗰個呀？」

我大笑說﹕「你睇唔啱，先至要講禮貌，去照顧下D醜女，扮有風度啫，唔通你見到靚女，仲去扮紳士咩！這正如你得閒無嘢做，就話去非洲做義工啫，唔通有幾千萬等你去揾，你都唔賺去非洲咩，係都賺咗落袋先去做義工啦。」

近日買的股票，隻隻都輸，所以無謂累街坊，不講股票了。記得在2012年，初寫股票時，也曾經有過一段凡買即輸的日子，只希望這些慘痛日子快點過去吧。

本文章由作者為橙新聞獨家供稿

作者簡介：

周顯，著名的炒股理論家，吃喝玩樂家，不著名的歴史學家、政治學家，過去還曾經當過社論主筆和武俠小說作者。

http://www.orangenews.hk/finance/system/2015/08/17/010018841.shtml