陳局長愛「聽」業界意見

【明報專訊】大家都知道，我很不喜歡陳家強，認為他當財經事務及庫務局長，是尸位素餐，搞死香港金融，現在他終於不連任了。不過，他日前就阿里巴巴因「同股不同權」而被否決上市的一番話，卻可以為我以上的斷言，作出新的註腳。

就這事件，陳家強稱「唔記得」為何談判破裂，但同股不同權「懸而未決」。

記住，是「唔記得」，你懂的。

至於去年的「上市架構諮詢」，遭到強烈的反對，陳家強透露不會全盤推翻原本建議，「我同Carlson（證監會主席唐家成）講，你哋有權，用咗佢先啦」！

記住，是在大量反對之後，仍然要有權用咗先。咁諮詢又有什麼用？

張華峯2012年當選金融服務界議員，他對陳家強的評價是「性格溫和，不同意亦不會即場動怒，亦樂意出席業界活動，但陳家強聽取業界意見要求後，好多嘢最後結果都未必係我哋想得到的結果，或者講講吓無咗下文……從來都唔拒絕我哋的睇法、要求。不過工作出嚟嘅效果唔係太明顯」。

真正革命家 不走上前線

看香港的新聞，往往笑到爆嘴，那天看到社民連前主席陶君行被訪問時說，「教主」黃毓民、熱血公民等組織，過去「只叫人去做，但唔係自己去做」，是極不道德。社民連則「有底線」，抗爭時不會傷人和破壞物件，被拘捕時更突顯當權者的不公義，發起運動時亦會身先士卒。

我作為一名歷史學家，告訴大家，其實所有的革命家，都是躲在背後指揮一切，所以為何孫中山策劃咁多次失敗的起義，都死唔去，咪因為佢無親自上陣囉。喂！嗰個係領袖嚟㗎，一旦瓜咗，革命咪無人統領，亦無人籌款囉！阿陶君行，你搞社運咁多年，唔係連咁簡單的基本歷史知識都唔知吖嘛？這正如你都識咗阿某君咁多年，並肩作戰，盲目支持對方咗咁多年，唔係呢幾年先至知道對方的為人呀嘛？這正如當日我做網台節目，兜口兜面窒劉夢熊﹕你識咗梁振英咁多年，唔係等到佢出賣你，你先知佢為人呀嘛？

知人不明，在政治上，已經是死罪了，因為人蠢無藥醫！

[周顯 投資二三事]

http://www.mpfinance.com/fin/columnist2.php?col=1463481127012&node=1498588994223&issue=20170628