外國公司銀行開戶 問埋上市問題

【明報專訊】外國公司香港開銀行戶口──難難難！

昨天說起銀行對客戶的刁難，今天說一單真實故事。

有一家馬來西亞公司，在香港的一家大型銀行開戶口，呢！最大嗰間呢。大家知道，今時今日，外國公司來港開戶口，好似查家宅咁查。

銀行職員問問他，為什麼馬來西亞公司，要來香港開戶口呢？

他說﹕「因為公司同香港有生意做，很多支票存入。」

誰知銀行職員追問，你把支票匯進馬來西亞的戶口就得，使乜在香港開戶口。這名仁兄轉述這句話時，忍不住說：「我嗰陣差啲想問候那位職員的老母，忍好耐先忍得住。」

Sales被綁實 難做生意

另一個真實個案，也是一家外國公司，在香港開銀行戶口，銀行職員問了他一大堆問題，其中一條他回答：「公司打算在香港申請上市。」

銀行職員追問：「咁你公司點解要在香港上市呢？」

他轉述這故事時，說法是：（下刪幾十字粗口）「我間公司點解在香港上市，好像是交易所問的問題，不是銀行開戶問的問題噃！」

在以前的金融業是Sales大晒，有客就乜都得，但現在則是compliance大晒，Sales被綁到實一實，郁都唔郁得。如果大家認為咁都做到生意，咁都可以成為金融中心，就無得講嘞！

前幾天，去了某政黨的一個聚會，講到如何promote政黨，我忍不住說：「搵大批美女入黨，必掂！」

那一枱，廿幾條佬，一個女仔都無，呢啲咁嘅政黨，邊有前途吖？大家聽到我的高見，齊齊拍掌，認為我是天才，然後他們當然叫我搵啲美女入黨啦！於是我打了幾個電話，誰知竟然無女肯制，美女們對炒股的興趣很大，但聽到政治，耍手擰頭，無好處唔制。唉！原來搵女搞政治，是咁難的，我終於同情他們的處境，嘆氣說：「如果我要入黨，都係本土派好啲，雖然不是美女如雲，但總算有幾條後生女，都好過你哋吖！」

[周顯 投資二三事]

http://www.mpfinance.com/fin/columnist2.php?col=1463481127012&node=1478545316021&issue=20161108