恒生炒到500元大有距離

【明報專訊】本欄3月20日說過「那天同一名基金朋友吹水，他講起隻恒生（0011）……中資正在密密吸納，準備在3年之內，買下整家恒生……炒到500蚊都有可能呀！老實講，炒到500元，可能難以置信，不過中資想買起恒生銀行，從政治戰略來講，卻是大有可能」。

當日恒生的股價是187元，大約兩個月後的今天，一度破了新高，達到203.4元，執筆時則是197元，但距離「吹水價」500元，仍有一大段距離要走。不過股票呢家嘢，真是好難講，呢條友講到咁誇張，就算達標一半，都可以當佢贏了。

達標一半都當贏

那天有朋友講起梁振英，雖然此人幾已成為一個歷史名詞，但我作為梁振英專家，都忍不住要「轉發」其話。話說朋友在1990年代，與梁振英同機，同坐Y class，竟見梁正襟危坐，挺直腰桿，去北京3個鐘的機程，竟然全程不動，朋友覺得簡直是神乎其技，大家都知道，梁振英身高六呎，真係好辛苦架！

我聽罷，只有一個疑問﹕當時梁生已經好疊水，又使乜咁克己，坐經濟艙呀！看來他真的是慳儉成性呢！不過，話時話，如果好似我咁細粒，經濟位都可以打橫坐，如果是昂藏六呎，也唯有正襟危坐，才可以坐得落呢！

對於梁振英的下台，我是最不高興的人之一，皆因我寫了一本關於他的書，他退任後，本書馬上成為廢紙，唯有把退書送人，還要求人收下，不過就是政界的朋友，收書之後，也沒有幾個人讀過，香港的讀書風氣真差！但近來有兩個朋友看過，一個左派，一個黃絲帶，都十分欣賞，令我老懷大慰，然而，手頭未派發的尚有幾百本之多，不知點算好，看來要免費送給讀者才可以了！

[周顯 投資二三事]

https://www.mpfinance.com/fin/columnist2.php?col=1463481127012&node=1525892241921&issue=20180510