【明報專訊】細價股的世界，和撈偏門差不多，很多莊家都怕被人劈，所以有保鑣跟出跟入，我曾經說過，某名莊家有幾個高頭大馬的北方美女保鑣跟着，真正的目的，除了保護老細之外，還有「威威食雞」的成分。
要知道，細價股的deal（交易）很多是undertable（枱底交易），口講口賠，當拗數時，就要出動黑社會講數，所以，黑社會也是莊家的必備「基建」，有一名仁兄，仲自己做埋龍頭大哥𠻹！
另外一名仁兄，因為向某大莊家收數，反而被賞識，大莊家說：「錢我就唔還畀對方，不過可以借幾百萬畀你使住先。」其原因，就是因為認識股票的黑社會十分之少，但不精通股票，又怎可以上枱講數、上門收數呢？正是因為人才難求，這名大莊家馬上招攬這名黑社會入伙，那幾百萬元advance（預付款 ），當然是「第日做嘢扣數」，扣完之後，還賺了好幾千萬元𠻹！
不可能掃清細價股莊家
警察拉黑社會，同證監拉莊家，道理也差不多，警察通常拉那些道友、蠱惑仔之類，唔通會拉大撈家？做賭場疊碼、開夜總會、大生意嚟，身家分分鐘一百幾十億，正當商人，點拉呀？至於證監，梗係拉細價股莊家，或者係艇仔啦！唔通去大行拉鬼佬，去拉大基金經理，我見過某名藍籌股老闆，喺自己公司做莊炒自己間公司股票，日日做足電腦紀錄，唔通證監去他的公司搬電腦做證據咩！
其實大家都知道，要掃清細價股莊家，同掃清黑社會一樣，是不可能的事，因為黑社會也有某些維持秩序的功能，除非是像當年共產黨入上海，用共產手法去掃啦！不過，警察雖然不可能掃清黑社會，但要掃蕩某名特別串，高叫十二點後我大晒的招搖分子，卻完全可以做到。現時證監主力打擊的，正是太過串的莊家，如此而已。
[周顯 投資二三事]
https://www.mpfinance.com/fin/columnist2.php?col=1463481127012&node=1517511243786&issue=20180202
沒有留言:
發佈留言