吹水股未買已炒上

【明報專訊】大約是兩個月前，我同某位大支嘢吃飯，講起心水股票，我說：「嗱，唔包生仔，輸咗唔好怪我呀，一隻是民生國際（0938），是阿媽，即母公司，另一隻是民生珠寶（1466），是個仔，但高人指示，會炒阿媽先，因為阿媽的市值比較大，利潤更高。」

他聽了我的分析，按機看看，說：「我都係中意個仔多啲，你同我出錢，買20萬元先啦！」

我心諗，嘩，你隻嘢，食飯從來唔畀錢，連買股票都唔畀，自從十幾年前我幫某君買股票，輸咗34萬元，佢做咗議員都無還錢，之後我發誓永遠唔會幫人買股票（同埋唔會畀人用槍指住個頭），於是我回答：「無倉，你自己買啦。」

他說：「好，你明天記得打電話提我。」

結果我梗係無打電話，因為，我之所以同他講，是因為他介紹過這兩間公司的老闆同我食過飯，我想再約一次食飯，收下風，但他都無下文，佢無下文，我梗係又無下文啦。跟住好快，隻股票就炒咗上去，仲停埋牌，所以我都唔知點收科先好。

選特首要先查家宅

昨天說到特首參選人，點知話咁快，已經開估，是前大法官胡國興。午飯時，有人問我，對於胡官選行政長官的看法，我說：「聽過胡官是好人，我都不反對他本人當特首，不過嘛，選行政長官，要選埋屋企人，他要全家都出來，給公眾驗一驗，看看特首夫人、特首子女、特首新抱合唔合格先得㗎。」

那人問：「咁你的意思即係……」

我說：「咁即係我認識他的兒子，同他兒子的女朋友，不知註了冊結婚沒有，後者我仲好熟，以前成日一齊打牌𠻹！」

那人問：「咁即係點唧？」

我回答：「即係……囉。」

[周顯 投資二三事]

http://www.mpfinance.com/fin/columnist2.php?col=1463481127012&node=1477591458630&issue=20161028