難為老千股定分界

【明報專訊】深港通開通在即，深交所特別增加了對老千股的提示，包括了業績差、市值小、股價低、頻密進行合併股分、大折讓供股或配股、令投資者權益可能被大幅攤薄等等。

對於以上的建議，我第一個問題，是股票只要中了其中一兩項，便算是老千股，抑或是全部中晒，才算是老千股先？首先，業績差的股票有好多，利豐（0494）的業績都不好，咁點計先？我認為如果用「業務流」，可能會更貼切，不過股民好少有能力辨認出業務是真是流。大折讓供股或配股，喂！匯控（0005）供股都大折讓啦，應該講明是大比例兼大折讓，才算正確。再講，好多新股老千到了極點，炒到無雷公咁高，都仲未玩供供合合啦！

港人遲早懷念梁振英

還有市值小，現在有的垃圾股，市值幾百億元，才是風險最大的，反而那些市值兩億元不到的股票，死極有個譜。至於股價低，好多內銀股都是幾蚊，但有些垃圾股炒到十幾蚊，咁又點計數呢？

那天同某名政界有識之士吹水，他語重心長地說﹕「我認為CY一定唔可以連任，因為有錢佬講明，anyone but CY，所以中央一定不會讓他連任。」

我說﹕「中央有無咁順攤呀？」

有識之士說﹕「咁又唔係噃，再嚟呢件，一定比CY更加惡啃！中央會話，你哋咪講明，anyone but CY嘅？講實咗，唔好反口喎……」

我說﹕「我同意你的講法，正如董建華退了，香港人懷念他，曾蔭權退了，香港人懷念他，sooner or later, you will miss梁振英！」

[周顯 投資二三事]

http://www.mpfinance.com/fin/columnist2.php?col=1463481127012&node=1476732117786&issue=20161018