港府專執洋垃圾

【明報專訊】我們一伙朋友，當坐在一起時，就講人的八卦是非，通常唔係醜事唔講，唔係誹謗都唔講，唔係大人物更加唔講，唔通八個二打六咩（有個擁有十幾隻殼的大莊家仲離譜，他同一班伙記說，唔係犯法的事唔准講）！

外國名譽掃地 回港做高層

前兩天，講起某位交易所大佬，梗係大家都好憎的人，靠擦鞋上位，又無料的那一種啦，某君說：「乜你唔知道他在外國，是名譽掃地，搞到好多人家破人亡，才回來香港，靠擦政府鞋上位的嗎？」

偏偏在座有位交易所高層，馬上八說：「點解我無聽過呢單嘢嘅？」

某君說：「乜你唔知㗎咩，如果你畀錢Google，它可以刪去所有不利你的連結。」

我插口說：「咁要買通埋雅虎先至得！」

有人居然說：「你哋個名都咁臭，又唔去畀錢Google同雅虎？」

某君說：「我是死豬不怕開水燙。」

我說：「咁我哋要移民第二個國家先至可以，因為在香港，人人記得我們的醜事，刪得谷歌雅虎，刪不到人們的記憶；所以這是過法龍專用，我們這些本土人不宜。」

其實，從古到今，港府都不知執咗幾多西方垃圾、假洋鬼子回來當高層。如果是在1997年殖民地時代，也還算了，畢竟是殖民地嘛；如果家陣執件親中垃圾回來，也算了，畢竟回歸了愛國愛港大晒嘛。但今時今日，還要在西方執垃圾，當正係寶，好似回到幾十年前，中五畢業的鬼佬都可當督察，在證監會和交易所，講英文不講唐文的假洋鬼子，連中文都唔識，就要管香港人，我們這些本土派，實在是不能不火滾的！

我說：「如果梁頌恆和游蕙禎提出以後證監會和交易所開會要用廣東話，我以後一定無條件支持青年新政！」

[周顯 投資二三事]

http://www.mpfinance.com/fin/columnist2.php?col=1463481127012&node=1476988418935&issue=20161021