【明報專訊】我們一伙人，包括了一些莊家朋友，在亂吹一通，談及有關近日股市的狀况，一名莊家慨嘆說﹕「其實我做莊以來，一直做得有規有矩，並不過分，殺散戶都有個譜，不會殺得太盡，總之是斬草不除根，春風吹又生，務求令到他們有再生能力。不過，近日隻乜乜乜，市值大、成交高，大手地去傳銷，引來很多散戶落疊，我很擔心。」
至於隻乜乜乜是邊隻股票，人哋搵緊食，不方便踢人飯碗啦，皆因阻人搵食，有如殺人父母嘛。
我說﹕「喂！阿老友，你幾時變得咁悲天憫人，居然同情啲散戶咁話呀？」
他說﹕「我邊係咁有同情心，我只係驚一隻好大殺傷力的股票殺落來，影響到我哋咋。」
莊家朋友憂被連累
我說﹕「出得來行，預咗有不可抗力的股災，總之就係，你今後做嘢，除咗睇住你的股票，以及整個大市之外，還要睇實呢隻股票，因為一旦殺落來，就會火燒連環船，連你的幾隻嘢都會跟住暴跌。」
他問﹕「咁你睇呢隻股票還可以升多久？」
我說﹕「從歷史看，最勁的妖股是當年的蒙古能源(0276)，1000億市值，但蒙古能源是乾晒來挾，這隻股票則有街貨。如果低一格的，就是一年前另外嗰隻，300億市值，但都比現在呢隻乾得多。不過，家陣股市咁癲，又唔係舊年可比，隨時搞到300億市值以上，也不敢包……」
他說﹕「咁即係點？」
我說﹕「炒股莫估頂，總之我自己一定不會買，殺頭都不買，但也不排除它再升一倍以上，你呢啲做莊嘅，繼續做嘢，唔通你做開賊嘅，因為怕咗同行累街坊，就收山唔做咩。」
[周顯 投資二三事]
沒有留言:
發佈留言