【明報專訊】話說有一次，一名老闆找了一個秘密地方，很鄭重地同我說﹕「喂，阿周顯，我明天去邊度邊度旅行了。」
我心想﹕「唓！你去旅行，又唔係請我去，做乜鬼特別約我出來講，嘥鬼晒我啲時間，要知道，I am a woman's man，no time to talk。」
第二天，他的股票突然大升特升，升到阿媽都唔認得，我沒有買這股票，當然是揼心個揼。
又過了兩個星期，老闆終於旅行回港，我再見到這名老闆，馬上捉住佢質問﹕「老闆，唔係化，你隻嘢開車，竟然唔講過我知，咁我點做你條靚呀！」老闆說﹕「嗰日咪同你講咗，我去旅行囉！乜你get唔到咩？」
有人謹慎入微 有人無法無天
事後，我同我的課程經理人Phemey講起這個故事，嘆氣說﹕「估唔到家陣炒股票，同黑社會劈友一樣，要個大佬離開香港，先至炒得。」
Phemey說﹕「阿邊個老闆，喺香港乜都唔講，都要去咗澳門，先至亂嗡廿四，都唔知點解。」
我說﹕「這個我都可以理解嘅，縱使是犯罪，只要犯罪地點不在香港，香港警察都好難拉人控告，不過，做到咁驚青，使唔使呀？」
話說有一名股壇奇才，手頭擁有十幾隻殼，同他吃飯，他大大聲咁講﹕「今日呢度，唔犯法的事唔准講！」據說有一次，他曾經同手下打賭，要手下的其中一名上市公司主席打電話給監管機構的職員，以粗口問候其親人，無法無天到了極點。這可以見得，在股壇，有的人小心謹慎，有的人卻玩「你吹得我脹咩」？總之就是各師各法啦。
[周顯 投資二三事]
http://www.mpfinance.com/htm/finance/20150401/columnist/en30_en30.htm
沒有留言:
發佈留言