大戶部署開單邊倉

【明報專訊】星期五那天，和一名股壇奇女子吃午飯，講起大市，她說﹕「個市好奇怪，應升不升，不應升就升，應跌不跌，不應跌就跌，好似開緊單邊倉，一旦開夠倉，就會走單邊了，我認為將會很快出現。」

這名奇女子，是連我都好佩服的那種，幾十億元身家，20幾歲已經發達，不過個名唔講得。但言談之間，她都傾向相信大市下跌居多。

至於我本人對市場的看法，查實現時氣氛已經衰到無倫，壞指標、壞消息都出齊了，奇怪的是，看指數，只是跌了區區一成，如果以跌咁少，但市場氣氛咁差來作對比，都真是好少見。

熊市一般年半見底

至於我和戰友們的策略，就是繼續抱持股票，原因很簡單，都無liquidity（流動性），點沽呀？如果股災，咪唯有齊齊等死囉！我說﹕「好彩大家都有番啲現金傍身，通常一個熊市，頂多年半就已見底，兩年開始復蘇有錢搵，只要手頭現金夠頂兩年，就熬過㗎啦！」

然後我問戰友，他架新款法拉利幾時到，他說﹕「年尾啦！」

我說﹕「自古以來，買勞斯萊斯同買法拉利都好邪，一買就股災，我自己就買親樓都會股災，落訂的第二日都即跌呀！」

他好奇問﹕「乜唔係剩係買勞斯萊斯先至邪咩？」

我說﹕「幾十年前，法拉利無咁流行，就兩者一樣邪，但近十幾年來，人人揸法拉利，就少咗聽呢句話嘞，不過魔咒是否依然有效，就好難講了。」

然後，我又同另一個人講起此事，她說﹕「唔係喎，我好多股友都買法拉利，都無事吖！」

我說﹕「呢個魔咒從來只是對撈偏門的人有效，股票也是偏門。你識啲仔全都是富二代，不受影響。」

[周顯 投資二三事]

https://www.mpfinance.com/fin/columnist2.php?col=1463481127012&node=1523301775315&issue=20180410