市况差 莊家朋友更爽

【明報專訊】上星期股市跌到鬼哭神號，星期五的那天，我和一伙朋友聚在一起哭股喪，大家互訴輸錢的慘情。

在座的其中一名朋友，是近年最為當紅的莊家，我問他﹕「喂，你幾時開返工呀？」

他很輕鬆地說﹕「隨時啦，下星期開返畀你睇，只要炒一隻勁升五成嘅，啲散戶就又跟番晒嚟，有乜所謂啫。」

上周急跌股 今周再炒起

我問﹕「個市咁差，你都做到嘢？」

他說﹕「唓！呢幾年來，股市升升跌跌，我有邊日無做嘢？個市好嗰陣，大家一齊搶錢，個市唔好嗰陣，我一個獨食，市場所有的散戶都只買我一個人炒的股票，仲爽呀！」

我說﹕「個市普普通通嗰陣時，人人無錢贏，係我一個贏，我覺得好威，但前排個市咁勁，一條茂利，只要肯亂咁炒，贏錢都多過我，我覺得非常之無癮。跟住前一排A股猛跌，大家開始輸錢嘞，但我仲係贏緊，於是沙塵白霍，牙斬斬咁，四圍認叻，點知到咗呢個星期，連我都被人洗倉清倉，所以家陣死過死魚，好沮喪。」

他拍拍我的肩頭說﹕「好啦，下星期醒番隻好嘢過你，等你贏番D啦！」

我沒有回答，皆因我剛剛才沽出了他炒的一隻股票，本來贏成倍，但因為它急跌，所以只贏了兩成。現在他說要炒這隻股票，我應該開心，還是應該痛心呢？我又應不應該買番轉頭呢？莎士比亞話齋﹕「To be or not to be, that is the question.」

[周顯 投資二三事]

http://www.mpfinance.com/htm/finance/20150706/columnist/en30_en30.htm