打擊啤殼是不可能任務

【明報專訊】證監會要去打擊啤殼，根本就是一個不可能的任務，是一個不可解的死結，只要稍為有點頭腦，都知道不可能；但是，香港政府的財經高官，從財政司長、到傻強、到證監會、到交易所，通通都是笨蛋，通通都在自欺欺人，才會一直搞不通這問題。

這條數，隨便找一個中學生，都一說就明：上市費用5000萬元，不但要交足稅，以後的經營還受到種種限制，從核數師到印年報，一年多花1000萬元少不免，小型上市公司集資額也是一億幾千萬，別忘記，上市過程又麻煩，而且還有不成功白花千幾萬的風險……如果不是為了啤殼即賺幾億元，你去上嘞。

減上市成本才能制止

有個後生仔問過我：「喂，上市唔係3000萬元就得㗎咩？」

我說：「你畀D corp fin佬呃啦，如果一切順利，3000萬元就可能得，不過你估你係證監會主席個friend咩，否則都好難一剔過。我個friend阿松，上間股票行，足足使咗8000萬元，阿冼師傅間財仔幾年前上，都使咗5000萬，人哋講3000萬就得，呃你生意㗎咋，傻仔！」

如果要禁止啤殼上市，首先就係要減低上市成本，喂，證監會使唔使長江中心做office呀，搬去上環咪得囉，租晒成幢證監大廈，100萬一個月仲有找呀。還有，證監會平均人工每人140萬元，應該都是成個政府人工最高的機構咯，而且仲唔使受到監察，任開，審計署都無得嘈，一年人工使十億，減一半又得唔得呀？

所以說，政府在金融管理方面，根本就是笨蛋，甚麼都不懂，但又貪得無厭，偏偏在這個世上，對金融無知的人又太多，導致笨蛋充斥，尸位素餐，對牛彈琴，講多無謂了。

[周顯 投資二三事]

http://www.mpfinance.com/fin/columnist2.php?col=1463481127012&node=1487269329218&issue=20170217