陳松青年代 發達容易搵食難

【明報專訊】恭喜發財，希望大家一年好過一年，今年行大運，發大財……當然，我本人一定要是最發的那一個！

過年前，某位「好堅」（請自行猜測他是誰人，已經給了足夠的貼士）的股壇高手講往事，他說，其實陳松青都係被人神化咗啫，隻佳寧講來講去，都係做咗炒的士同埋美國銀行大廈兩單大刁，他在新加坡時，都不過是一個普通的會計師仔啫！

跟着他又講到，當年陳松青炒的士牌，從十幾萬一個炒到38萬，皆因市面只有1萬個的士牌，每年增發200個，但當陳松青買乾晒，狂炒之後，香港政府突然改為一季發200個牌，咁陳松青唔死都唔得啦！

這個故事的教訓是，炒還炒，千萬不要惹毛政府，否則政府要整蠱你，你死都唔掂。記得當年美國的亨特兄弟炒白銀，也是炒到政府干預，加期貨孖展額，他們先至被揸爆。

炒家最忌得罪政府

這位好堅的股壇高手說﹕「我就係多得佢，當的士牌價大冧後，一次過包晒200個牌，11萬一個，後來60萬沽出，賺到了第一桶金。」

我問﹕「11萬一個牌，3萬一架車，加埋14萬，你做咗幾多槓桿？」

他說﹕「同政府一次過包晒200個牌，是11萬一個，好似股票做placing，有折讓，街價是14萬，的士又可以供車，根本一毫子都唔使畀，的士佬同我供車，個個月仲有現金收，根本無驚無險。」

唉！由此可以見得，在當時，財技不發達，懂得玩財技的人，賺錢是多麼的容易，正是曹仁超常說的，發達容易，搵食艱難，現在則掉轉頭，搵食容易，發達艱難！

[周顯 投資二三事]

http://www.mpfinance.com/fin/columnist2.php?col=1463481127012&node=1485974167395&issue=20170202