識老闆要先sell橋

話說不久前，我的朋友說要介紹「東南國際」(726)新老闆余勝明給我認識，誰知過了一個多月，居然沒有下文，我惟有致電催他，問他是不是「大隻廣，口慷慷」。

這位朋友的回答是：「喂，你要識老闆，都要有條絕世好橋，先至可以有藉口去介紹架，唔通我貿貿然同個老闆講，有個朋友想識你咩。」

我說：「乜我周顯大師個朵唔夠照咩？」朋友說：「國內老闆，點知周顯大師是乜水，除非他看過你的武俠小說啦。」 

我沒好氣說：「要咩絕世好橋去識老闆呀？」

朋友說：「梗係搞佢隻股票的橋段啦，唔通度橋拍戲咩。」我說：「家陣億幾銀市值咁低，很多財技都做不了。我認為，甚麼都係假，首先要把市值拉高，才可以講嘢。」

朋友說：「那怎麼去把市值拉高呢？願聞其詳。」我說：「拉高市值不外乎3種方法，一係炒高股價，一係發新股或供股。但老細的買入帳面成本是1.54元，現在的股價是0.445元，你叫他低價發新股，他一定扑你個頭。」跟著內容……下刪百幾字，本來寫好了，但覺得有法律問題，為免被人「的」去問話，所以刪掉了。

朋友說：「好，我同老細sell呢條橋，你等我好消息。」

我說：「我見你講開先至講咋，我其實好多嘢做，都不是很有空識新老細。不過，如果你要我講一條橋，我講不出來，我都好無面。」朋友說：「不過，你呢條橋，表面浮誇，實際只不過是好普通的大路嘢，唔算得乜嘢絕世好橋喎。」

我說：「橋唔怕舊，最緊要老細受，市場受不受，反是其次。十幾年前市況不好，市場沒有散戶參與，只有A君不停溝到老細。原因？是他不停大讚老細的股票好值錢，炒高幾倍都大把基金要，結果是老細出資給他炒股票，老細輸光收場，他卻日進斗金。」朋友說：「結論是……」

我說：「結論是，sell老細，就像溝女一樣，要把老細的公司讚到天上有，地上無，佢話乜都得，話佢間公司好值錢，因老細愈雄心壯志，我們賺的錢愈多，所以一定要博命去撥他。反過來說，如老細向下炒，我哋咪賺得份佣？幾十萬，仲可能幾個人分，一個人分得十雞八雞，買糖唔甜，買鹽唔鹹，還是做少單，算數罷了。」

http://www.am730.com.hk/column-212997