逃難保命 忌揸不動產

【明報專訊】有位內地朋友，她喺內地大型科網公司工作，年薪計埋option千零萬嗰種，算是中層員工啦，我們食飯吹水，談論政經大事。

她說：「自從習近平宣布修憲，百度對移民的搜索馬上增加了好多好多。」

我說：「你都有香港身分證啦，不如喺香港買返間屋，我覺得尚匯600幾呎實用，1800萬的單位，都幾啱你住。」

她說：「我想買倫敦樓，我啲同事都已經喺倫敦買咗樓。」

我說：「你無外國護照，有倫敦樓又有咩用？如果中國發生巨大政治變局，有可能西方突然取消香港特區護照嘅特殊地位，變成同中國護照睇齊，你根本去唔到倫敦。」

她說：「咁我咪要買返本外國護照？」

我說：「其實而家移民好多歐洲國家，幾百萬元就得，而且只要住7日。記住，講到外國護照，幾多錢永遠唔係問題，住幾耐先得到先係最大問題。」

她說：「咁幾百萬，我都拿得出來嘅。」

我說：「如果你要逃難，唔通去到嗰邊，要洗大餅過活咩，最少都要有返三幾千萬元，逃難都有錢生活至得㗎。」

她計咗一計：「咁我都係過幾年，先至移民兼去倫敦買樓。」

外國銀行存錢買藍籌 穩穩陣陣

我說：「歐洲正在沒落，你要喺嗰邊留一條後路，又使乜買樓？你存幾千萬喺倫敦匯豐銀行，等到股災先至買入藍籌股，穩穩陣陣，存下定期，長揸優質股，保存流動資金好過啦。記住，你在歐洲的錢是用來逃難保命，一定要有流動性，點可以買縛手縛腳的不動產㗎？」

[周顯 投資二三事]

https://www.mpfinance.com/fin/columnist2.php?col=1463481127012&node=1519845039855&issue=20180301