據說有人向某位上市公司老闆力sell，說有買股票的大媽團，只收若干介紹費。
要知道今時今日，買股票的人流仲少過廟街，上市公司要賣股票，仲難過賣連環圖，上市公司老闆聽到「大媽」兩個字，當然是即係扒口飯……然後𦧲飯應啦。
但世上邊度有咁筍的事？如果條友有大媽，不如賣自己的股票啦，點會幫你賣？結果係此人既賺了介紹費，又賺了低位偷買了少量股票，高位沽出，而老闆則「貪字得個貧」，炒高咗隻股票，日日頂住股價，都唔知點算好。
賺介紹費兼偷買搵銀
「假大媽」事件令我想到2000年後股市不景，無人炒股票，那些金融古惑仔唯有調轉槍頭，向上市公司老闆著手。
那時有很多小型上市公司，老闆是在內地設廠的廠佬，乜都唔識，但又想在股市食大茶飯，成日不切實際希望把股票炒高賣出。
正常人當然做不到啦，個市咁淡，但係古惑仔就天花龍鳳，乜都話得。結果老闆落疊炒高股票，古惑仔又賺佣，又賺偷買，一劑賺三幾百萬都幾爽㗎。
沒有留言:
發佈留言