疊碼仔炒賭股 悉先機賺到笑

【明報專訊】近來同一名不大懂得股票，但在賭界混了多年的朋友吹水，講起林積，我說﹕「以前集美會有開，我成日去打牌，周不時撞到他，但自從那位置租了給東方棕泉之後，我就沒見過他了，佢阿叔林叔就偶然會見到。」

朋友說﹕「呢幾年佢好有錢，發到巴巴聲。」

我說﹕「佢不嬲都有錢㗎啦！十幾年前，已經過百億身家，不過好多係人哋欠他的街數，做賭嘅，好多時賺埋賺埋，就係客人的account receivable（應收帳款）……其實做好多生意都係咁，尤其是做廠。」

朋友說﹕「不過他衣家是堅有錢，好多cash。」

我說﹕「唔怪得他隻集美國際（1159）炒到飛天，原來大把錢唔志在。你早響吖！等我喺低位買番啲吖嘛！」

賭業能雙位數增長 才真正爆升

查實近來賭股升了不少，很多疊碼仔炒金沙中國（1928），已經賺到盆滿砵滿。無他嘅，他們擁有第一手的市場資訊，洞悉先機，炒濠賭股又有乜辦法唔贏吖？

話說有好幾家出賭股的輪商，見到那幾家有名由疊碼仔經營的證券行，一出牌去買，即刻縮牌都縮唔切，皆因這些疊碼仔證券行，無寶不落，買親幾乎贏了九成，要知道，班疊碼仔又有錢，賭性又強，賭得好狼死，班輪商都咪話唔驚。

那名疊碼仔friend同我講﹕「衣家賭業增長尚未穩定，如果個個月都有雙位數增長，先係真正爆升期。」

姑妄錄之，給讀者參考only，至於我本人，從來只賭垃圾股，大隻的藍籌濠賭股永遠不研究，更加不會炒。

[周顯 投資二三事]

http://www.mpfinance.com/fin/columnist2.php?col=1463481127012&node=1490125041971&issue=20170322